Way narehistrong legal nga Philippine Offshore Gaming Operation (POGO) dinhi sa dakbayan sa Sugbu sumala pa sa Business Processing and Licensing Office sa city hall. Kung kini maoy tuohan, wala gyuy ingon niini nga operasyon sa siyudad.
Mao sab kini ang pamahayag sa Police Regional Office-7 pinaagi sa tigpamaba niini nga si Police Lt. Colonel Gerard Ace Pelare dihang gipangutana bahin niini human si Presidente Ferdinand Marcos Jr. mimando sa hingpit nga pag-ban sa POGO dinhi sa nasud tungod kay gihimo kining takuban sa mga kalihokan sa kriminal ug gibiay-biayan lang ang mga balaod sa nasud.
Apan dili dapat ikampante nga walay legal nga narehistrong operasyon sa POGO dinhi sa siyudad, mas maayo pa gani kun rehistrado gyud kay mapugos sila pagtuman sa mga regulasyon ug labaw sa tanan makolektahan gyud sila og hustong buhis.
Maayo nalang na nga dunay makolektang buhis kay magamit kini sa ubang mga programa ug proyektong para sa molupyo sa siyudad ilabi na niadtong mga nagkinahanglan niini apan walay makuot sa bulsa, makatabang pa kini sa mga tawo ug sa siyudad.
Apan bisan walay narehistro wala tingali kini nagpasabot nga wala gyud niini dinhi nga patago nga nag-operate. Mao nga husto ang gipamulong sa BPLO sa Cebu City nga ilang susihon kining mga “POGO-like” nga mga establisamento.
Kung buot hunahunaon, kung dunay makolektang buhis gikan niini nagpasabot nga makatabang gyud unta kini. Mas maayo tingaling himuon silang legal.
Pwede man sab tingali nga kun hingpit nang mawala kining mga Chinese operators niini dinhi sa nasud, saw-on kini sa mga Pilipinong negosyante basta rehistrado lang gihapon sa PAGCOR ug sa mga hingtungdang ahensiya ug sa mga lokal nga kagamhanan diin sila nag-operate.
Pagkatinuod, wala lang gyud kapugngi nga adunay mga langyaw nga gigamit ang POGO sa ilegal nga kalihokan. Mga kalihokang giisip ni Marcos nga dili maayo sa interes sa mga Pilipino ug nagbutang sa peligro sa nasudnong seguridad.