Mao kini ang paghulagway mismo sa upat ka mga babaye nga naengganyo nga magpa-enhance sa ilang kaanyag to the next level ilabi na sa pagpataliwtiw sa ilang ilong pinaagi sa pagpaubos sa hiko nose thread procedure sa babaye nga gituohan nilang doktora sa pagpaanyag nga nakaila lang sa online.
Midangop ang mga babaye sa National Bureau of Investigation Central Visayas Regional Office tungod sa makalilisang nga nahitabo kanila hinungdan nga nadakpan ang "MD Mora’g Doktor" nga suspek kinsa na-entrap sa sulod sa usa ka hotel sa baranggay Lahug diin gipahigayon usab ang nose job procedure.
Nakuha gikan sa suspek ang mga gamit apil na ang mga injection ug mga medisina nga gigamit niini sa pagtusok ngadto sa parte sa lawas nga gustong panindoton sa iyang mga kleyente. Gani naa pay usa ka petroleum jelly nga gikabalak-an sa mga biktima nga basin maoy gipasulod ngadto sa ilang ilong kay delikado matud pa.
Atol sa akong pakighinabi sa mga biktima gitug-an nila nga nadani sila sa barato nga offer isip bayad sa pagpataas sa ilong, P5,000 kong walay collagen apan kong duna mo-additional og P2,000 ug gamay ra mana ng deperensya ang package deal na ang ilang gikuha.
Buwan sa Abril gihimo ang procedure diin giingnan sila nga maayo ini’g human sa usa ka buwan. Apan wala man mamaayo ang ilang ilong. Gani matud nila nga nanghubag naman apil ang ilang nawong ug namudlat ang ilang mga bata ug labaw sa tanan hilabiha ka sakit sa ulo ang ilang gibati nga daw imudmud ang ilang nawong tungod sa nahitabo.
Gani naay usa ka pamilyahan gyud ang nagpaubos sa beauty enhancement procedure tungod kay kaslonon ang anak nga babaye sa buwan sa Septembre ug mora’g midyo dili perfect ang ilang ilong maong ilang gipatrabaho, ang inahan apil na ang future mother in law ni-avail sa barato nga promo apil pa gyud diay ang kauban sa trabaho.
Sa sinugdanan nagpasalamat sila kay mora’g nindot man ang resulta. Apan kadyot ra diay tungod kay nangatol naman ang ilang ilong ug tibuok nawong ug nanglagum pa nga matud nila mura na gyud sila og mga abat kon sa ininglis pa avatar kuno pastilan.
Ang nagpadoktor-doktor nangatarongan nga giingnan na niyang daan ang mga babaye sa posibleng mahitabo apan nagpadayon gihapon. Rason ra pud ni niya ug unang higayon kini nga adunay nangadaut sa iyang nose job procedure ug wala pud kuno siya magpaila nga doktor.
Matud sa suspek dihang akong naestorya, usa siya ka aesthetician ug nakatapos siya sulod lang sa tulo ka buwan. Pastilan delikadoha gyud nga nagbutang sa peligro sa kinabuhi sa mga tawo tungod sa iyang gihimo.
Ok ra man gyud unta nga magtinguha nga mosamot ka kagwapa o kagwapo basta segurado lang nga mao kini ang resulta, mahal man ang presyo apan sure man ang resulta. Apan ang uban nga magdaginot mosawom dayon sa offer ug ang resulta hilabihang batia ug madak-an na sila sa gasto kong ipa repair nila sa laing doktor ang damage sa ilang ilong o sa ilang nawong.
Kadtong wala pay budget ayaw lang sa ipatandog ang inyong ilong baha og gahapla o galisngag na kay sa mamahimo kang sama sa usa ka abat kong dili na makorehian ang kadaut nga mamugna sa procedure nga gihimo sa usa ka tawong mangingilad ug kwarta ra ang giapas. Leksyon kini nga angayan hinumduman sa tanan.