Tawgon og" rayna-rayna

Mihimo og public apology ang kanhi TV host ug sakop Sa LGBTQ+ community nga si Jude Bacalso human siya “labhi” sa social media tungod sa pagpakaulaw ug pagpabarog niya sa waiter sa usa ka restaurant sulod sa duha ka oras tungod lang kay gitawag siya’g “SIR” sa maong waiter. Gilantaw sa daghan’g netizen nga sayop ang pagpakita ni Jude sa gahum ug impluwensya.  Makapahinumdum sa akong amigo’ng pulis nga gituohan nga mao na’y hepe sa usa ka presinto. Ako siya’ng gitimbaya sa pag-ingon nga, “Congrats! Ikaw na man diay “hari-hari” diha sa presinto.”  Mitubag ang akong amigo’ng polis nga “Dili man na tinuod, pero mosugot na lang ko ingnon ko ninyo’g “hari-hari” kay sa tawgon ko ninyo og “rayna-rayna.”   Pagkatoytoy!

Panag-uyon human sa panagsumpaki    

Luyo sa mga pagdayeg sa daghan’g mga opisyal sa nasud sa gihimong SONA sa Presidente, gisaway gihapon kini sa oposisyon lider nga si Kongresman Edcel Lagman tungod kay kulang kuno kini sa detalya kon unsaon pagpatuman ang mga polisiya nga gilatid sa Presidente ug nga  gibalik lang usab sa Presidente ang uban niini’ng mga pamahayag.  Dili na ikahibulong ang reaksyon sa atong mga opisyal.  Kadtong mga dumadapig sa Presidente moabiba ug kadtong mga oposisyon, mosaway.   Apan dili angay isalikway ang oposisyon kay ginaingon man nga “Human sa panagsumpaki, modangat ang maanindot nga panag-uyon.”  Muleeng!

Lahi-lahi nga balaod

Gikwestyon sa COA ang papel sa uban’g mga Cebu City government officials sa ilang pagkuyog sa pagbiyahe ni Cebu City Mayor Michael Rama ngadto sa Vladivostok, Russia.  Alang sa COA, wala mahisubay sa Executive Order 77 nga giluwatan ni kanhi Presidente Duterte nga nagdili pagdala og daghan opisyal sa biyahe.  May punto tingale ang pagkwestiyon sa COA.  Apan makapahibulong usab kon ngano’ng walay susamang obserbasyon nga gihimo ang COA sa uban’g LGU diin daghan usab ang mga biyahe sa mga opisyales nga matawag nato nga “junket trips.”  Matud pa sa akong amigo, “Lahi-lahi tingale ang balaod nga ipatuman sa COA sa matag LGU".  Madahaan!

Luwag inay kutsara

Giaprobahan na sa Senado ang balaodnon nga naghimo’ng optional sa paggamit sa atong kaugalingon’g lenguwahe isip medium sa pagtudlo sa mga Kindergarten ngadto sa Grade 3 nga mga tinun-an.  Ang medium of instruction nga gamiton mao lamang ang Filipino ug English subay sa nalatid sa Konstitusyon.  Malantawan nga aduna’y mga ginikanan ug apohan nga maglisod na og pakighinabi sa ilang mga estudyante kay dili na man sila masabtan sa mga bata kay naanad na og iningles.  Makapahinumdum sa akong apo nga gisugo pagkuha og kutsara, nagdala na hinoon og luwag.  Fezteleern!

Wala na’y mo-sideline

Namahayag si DepED Secretary Sonny Angara nga ang P5 mil nga “chalk allowance” sa mga magtutudlo ihatag karong Hulyo 29. Lain na usab kining kaayohan alang sa atong mga magtutudlo.  Hinaut nga padayon ang atong gobyerno sa pagpa-usbaw sa ilang ekonomikanhong kahimtang aron maka-focus sila sa paghimo sa ilang gimbuhaton.  Wala na unya’y magtutudlo nga mo-sideline og paninda’g bukhayo ug ice candy sa iyang mga tinun-an.  Atala lagee!