Comelec wala na kahay magic?

Iyahay na'g diskarte ang mga tadhang magpapiling politiko alang sa 2025 midterm election.

Sama sa naandan, kon unsa ang partido ug mga aliyansang partido sa kinsay nakalingkod nga Presidente sa Pilipinas, mao kini ang kinahumotan ug puntariyahan sa naasoy'ng traditional politicians. Pangutana: Aduna bay kaayohang nahimo sa atong nasod kining mga poltikoha?

Sa adminstrasiyong Duterte, gihugpaan man tuod sa naghurementadong pandemiya ug gihasmagan sa grabing pagtaas sa presyo sa gasolina, apan ang presyo sa mga inadlawng panginahanglan, nakontrolar, Misaka man tuod, pero dili dako. Apan karon sa pagpamunoan ni Presidente Bongbong Marcos (PBBM), ang pagsaka, na-triple pa!

Unsa bay gibuhat sa atong mga Kongresista, Senadores ug PBBM mismo? Miumol ba silag balaod nga makapugong sa makahayblad nga presyo? Or, nagsige gihapog pangutang og tinrilyon aron mapun-ag binilyon ilang confidential fund agig pangandam sa midterm election?

Sa pagsulat niini, aniay tentative list sa 11 pa lang ka lumansaray pagka-senador nga gi-post sa social media, ubos sa mga pako sa administrasiyong Marcos: Pia Cayetano, Lito Lapid, Bong Revilla Jr., Vcente Sotto III, Francis Tolentino, Imee Marcos, Manny Pacquiao, Ping Lacson, Raffy Tulfo, Benhur Abalos ug Camille Villar.

Kini sila halos pulos re-electionist. May nakapalambo ba nila sa Pilipinas ug nakapaaasenso sa tanang kabos? Sa kadugay na nila sa Senado-Kongreso, nakapanday ba silag balaod nga hingpit mopuo sa mga korap? Or walay mipanday kay hadlok maunay?

Hinungdan, daghang nabalaka sa 2025 mid-term election. Kay bisag gitangtang na ang kaniadtong smartmatic vote-counting machine sa Commission on Election (Comelec), dili man makaseguro ang katawhan kon ang gipuling Miru custom-made-vote counting machine, dili ba kaantigong manikas? Sanglit delikado, nga ang mga kandidatong maoy gipili sa kinabag-an mapilde ra gihapon.

May miingon nga dili kuno madaya ang computer. Kana kon ang mopindot sa mga tekla, honest ug dili daling malimot sa Ginoo oras nga tentalog P1B-bribe money sa yawa bugti sa kinsay gustong padag-on nga kandidato?

Kanang gipamiling opisyales ni PBBM sa Comelec, pulos ba honest? Makagarantiya ba sa katawhan nga wala nay magic sa iniphanay, gamit niining bag-ong Miru-custom-made vote buying machine nga maoy gamiton sa 2025 midterm election?

Unta, makatilaw na kitag limpiyo-honest nga piniliay ug iniphanay!