Ang sugyot sa pipila ka engineer sa Cebu City government nga maghimo ta og dam, kun water reservoirs duol sa bukid aron adto kuno usa mopundo ang tubig ug mapugngan ang paglunop sa mga lupa nga bahin dinhi sa siyudad, nindot sab.
Apan sa akong tan-aw, ang tubig nga gikan sa kabukiran makaya ra man gyud sa atong mga sapa kon habwaan lang kanunay sa mga lapok ug mga sagbot, ilabi na kon ibalik ang gidak-on sa mga sapa nga migamay na.
Ang Guadalupe River wa gyuy problema kay lawom man ug dili gyud makaawas ang baha. Sa Lahug River maproblema usahay ini'g abot diha sa Zapatera, Lorega-San Miguel ug T. Padilla kay mimabaw na man pag-ayo ang sapa diha.
Ang Lahing-Lahing Creek nga nagsubay kilid sa Hipodromo paingon sa Mabolo, gamay na kaayo kay gipalapdan man ang kabalayan sa mga hangol kaayo og pwesto nga namuyo daplin sa sapa.
Mao usab kini ang nahitabo sa Parian Creek, kanang sapa nga naglagbas ilawom ug kilid sa mga dagkong tindahan diha sa downtown area, sama sa Colon Street, paingon na sa Pier 3.
Ang sapa nga gikan sa Barangay Day-as nga milagbas sa Sikatuna Street kada agi nako diha, motan-aw gyud ko ug karon, gawas nga gamay na kaayo ang sapa, napuno na sa mga lapok ug sagbot.
Natural nga kon mag-uwan, bisan og hinay ra kaayo, maglunop gyud ang eskina Bonifacio ug Sikatuna Street nga sakop sa Barangay Parian.
Balikon nako, gitun-an nako pag-ayo kining maong problema, apan wa ko’y mahimo kay dili man ko apil sa Task Force Gubat sa Baha.
Ang amigo nako nga maoy usa sa nagdumala sa Task Force akong giingnan nga kon ako ang pagbut-on, hiusahon nako ang tanang kawani sa Cebu City government ug ang barangay, aron magtinabangay pagsulbad.
Unahon pagsulbad ang Parian Creek nga gitawag kaniadto og Estero de Parian kay mao kini ang naghatag og dakong problema kay makapalunop sa downtown area.
Isunod ang T. Padilla River, nga kabahin sa Lahug River, kay mao ni ang makapalunop sa Parian ug sa M.J. Cuenco Avenue.
Dayon ang sapa nga gitawag og Mahiga Creek dapit sa Subangdaku, Mandaue kay moaway ni kon mag-uwan ug makapalunop sa M.J. Cuenco Avenue.
Ang Parian Creek maoy angay’ng unahon pagtagad. Unya, gub-on gud kanang balay nga anaa gitukod nga nagpatong gyud sa sapa, tungod gyud sa Arellano Bridge!
Kon dili na gub-on, tabla ra nga “pakitang-tao” ang atong kampanya pagpangguba sa mga estraktura nga anaa sa 3-meter easement sa sapa, unya ang anaa gyud hinoon sa sapa, gipasagdan.