Dunay sukaranan ang kahimangod ni suspended mayor Michael Rama ngadto sa iyang bise mayor ug kaalyado sa politika nga karon maoy nagsilbing acting mayor human sa kamandoan sa Ombudsman nga nagpaubos niya sa unom ka buwan nga preventive suspension.
Gipadayag ni Rama nga wala siya makauyon sa direksiyon nga gisubay karon ni Acting Mayor Raymond Garcia.
Kini tungod kay ang tanang gihimo ni Garcia pulos sukwahi sa direksiyon sa iyang administrasyon.
Ug dili malimod nga popular ang tanang mga lakang ni Garcia.
Sa gibuhat ni Garcia nilutaw ang kangil-ad sa administrasyon ni Rama.
Sukad sa unang adlaw sa iyang pag-asumir sa pwesto isip acting mayor, ang tanang gibuhat ni Garcia, ambot sulagma ba lang ug tinuyo, pulos nagpintal og bati ngadto ni Rama.
Gisweldohan dayon ni Garcia ang upat ka mga kawani nga nakaiingon sa pagkasuspenso ni Rama.
Gipirmahan dayon ni Garcia ang excavation permits sa MCWD nga gilumloman ni Rama sud sa kapin na sa tuig.
Nakigsabot dayon si Garcia sa CPA. Ug labaw sa tanan migawas nga hero si Garcia sa iyang pag-review sa mga kontrata ug budget alang sa Palarong Pambansa diin gibisto kintahay ang labihan ka dako nga budget ug ang posibling mga anomaliya sa procurement.
Apan sa dili pa ta hingpit mutuo nga tim-os ug lunsay ang motibo sa acting mayor ug di politika ang nagpahipi niining tanan, maayo tingali nga ato siyang suknaon unsay iyang papel dihang miagi sa konseho ang budget alang sa Palaro.
Isip bise mayor ug presiding officer sa konseho, unsay iyang gihimo dihang gisumitir ang budget alang sa approval?
Nganong wala nila mabantayi ning maong mga detalyi dihang miagi sa konseho ang budget?
Tungod ba kay alyado sila sa politika? Busa may rason si Rama nga mag-alburoto nganong siya nalay gidakdakan sa tanang pagbasol.
Ang akong punto mao nga di kapanghunaw si Garcia ug ibasol tanan kang Rama kun duna may palpak sa pagbudget alang sa Palaro.
Ang konswelo nalang sa mga magbubuhis niini mao nga gihimo ni Garcia ang angayang buhaton aron makorehian ang sayop.