Makabungog nga panghambog

Sa pagtambong ni Department of Interior and Local Government Secretary Benjamin ‘Benhur’ Abalos Jr. sa 33rd Session of the United Nations Commission on Crime Prevention and Criminal Justice didto sa Vienna, Austria sa miaging Mayo 13, 2024, atubangan sa mga dagkong tawo gikan sa nagkalainlaing nasod, mapagarbohon niyang gibasa ang naangkong kalamposan sa war on drugs ni Presidente Bongbong Marcos (PBBM). Aniay tipik:

“The supply of demand and reduction strategy of President Ferndinand Marcos Jr.’s anti-illegal drugs campaign has greatly improved the Philippines fight against prohibited narcotics.”

Si Abalos mipuno, nga gumikan sa malamposong kampaniya ni PBBM batok illegal drugs, nakasakmit kinig S587M sa mga ginadiling narkotiko sulod sa duha tuig.

Diin ang numero miabot-saka ngadto sa 700%, ikomparar sa nanglabayng katuigan. Ug nakab-ot nga minus ang kinabuhing nakalas.

Usab, siya mipasiatab sa ilang ‘Buhay Ingatan, Droga’y Iwasan’ (BIDA) project, diin ilang gipahimug-atan sa pag-implementar ang kabililhon sa kinabuhi sa tawo. Nga maoy usa sa mga hinungdang milampos sila sa pagpa-us-os sa mga kinabuhing makalas. Pero ang pangutana, miubos ba tinuoray ang pinatyanay?

Ang tonetoneladang shabu nga maimbargo, diin walay pisikal-dugoong aksiyon sa engkuwentro, o ang drayber sa SUV nga maoy gikargahan niini, mokalit ra pagkahanaw sama sa nahitabo didto sa Batangas, diin si PBBM pa mismo ang mipresentar sa polis, kinsa maoy nakaharang-sikop niini didto sa naandang checkpoint, igo nang ikarason sa gipanghambog ni Abalos nga ang administrasiyong Marcos maoy kinadaghanang nasikop-sakmit nga illegal drugs, diin wala gyoy kinabuhing naalaot.

Unya, gituohan-gikalipay ba kini sa katawhang nagpakabana?  Wala, uy! Sila pulos nadismaya niining war on drugs ni PBBM. Kay gipanghambog man tuod ni Abalos nga dili bloody, pero very sweet and so friendly.

Tan-awa, unsay gidangatan? Ultimong mga bata pa, grupo sa lainlaing frats, wala nay kukahadlok mopatay-makigpinusilay sa ilang makit-ang kontra. Amahan ug igsuon unayog patay sa anak, diin sa imbestigasiyon mogawas nga pulos diay nakahithit og shabu ang mga sad-an.

Sa laktod, mitaas na ang crime rate sa Pilipinas. Ug mosaka pa kini kon ang mga punoan sa yawan-ong aso maoy alimahan sa pagbisibis kanunay, inay hingpit puohon.

Pastilan, Abalos, makabuhong-tiunayng serbisyo intawoy among gipangandoy, uy!  Ug dili makabungog nga pagpanghambog!