Naamong ra tawon

Ang nahitabo sa tulo ka batan-on nga gipangpusil samtang kuyog sa ilang mga barkada atubangan sa usa ka tindahan didto sa Barangay Yati, Liloan kaniadtong Huwebes sa kaadlawon, angay nga kuhaan og leksyon sa ubang ginikanan.

Gani, ang tagtungod sa namatay nga 16-anyos, miingon nga ang dalagita mosibat gyud gikan sa ila aron makig-uban sa iyang mga barkada kon malipat sila. Pastilan, dili maayo nga batasan sa usa ka menor-de-edad.

Resulta, naapil siya sa krimen kay gipangrapido sila og mga bala sa mga armadong tawo nga misibat ra usab sakay sa motorsiklo. Kon natulog pa unta siya’g sayo didto sa ilang balay, buhi pa unta siya ug tingali maayo pa og kaugmaon.

Busa, kamong mga ginikanan, kontrola gyud ninyo ang inyong mga anak nga dili maglaroy-laroy panahon sa lawom na nga gabii, ilabi na og kadlawon na. Pakyas mo sa inyong pagka ginikanan kon masagdan ra ninyo ang inyong mga anak nga mosubay sa hiwi nga dalan sa kinabuhi.

* * *

Nalooy ko ni Mayor Michael Rama nga naapil sa 6-months preventive suspension nga gimando sa Ombudsman tungod sa reklamo sa upat ka kawani sa City Hall nga gibalhin og laing trabaho, unya wa pa gyud tawon masweldohi dayon sulod sa 10 ka buwan.

Karon hinoon, nasweldohan na sila sa upat ka buwan, pero duna pay wa pa nila madawat. Natan-aw nako nga naamong ra gyud tawon si Mayor Rama kay nakasiguro ko nga dili siya maoy nagmando nga balhinon sa laing trabaho ang upat ka kawani.

Labaw na nga dili ko motoo nga si Mayor Rama maoy nagsugo nga dili hatagan sa ilang sweldo ang upat ka kawani. Gani, pagka karon, ang maong mga kawani naguol kay nasayod man sila nga dili si Mayor Rama ang naglisud-lisud kanila.

Tan-aw nako, ang hepe sa Assessor’s Office nga si ma’am Maria Theresa Rosell mao gyud unta ang angay’ng manubag ngano nga gipabalhin man niya sa laing opisina ang maong upat ka kawani.

Unya, angay’ng susihon usab pag-ayo nganong wa man sila masweldohi? Kinsa man sab kaha ang nagmaniobra nga dili sila masweldohan dayon sa 10 ka buwan?  

Dunay miingon nga dili sab makalikay si Mayor Rama kay siya man maoy nagpili sa mga tawo nga gidestino niya sa lainlaing mga departamento.

Klarohon lang hinoon nako nga ang preventive suspension nga gimando sa Ombudsman, dili kini silot, wa pa mapamatud-i nga sad-an sila si Mayor Rama ug kaubanan.

Gitumong ang preventive suspension aron sila si Mayor Rama ug ubang opisyal sa City Hall, dili na makahilabot sa mga dukomento nga posibleng gamiton sa nagpadayong imbestigasyon.

Paabuton lang nato kon unsay sangpotan niini.