Kainit ug kagubot

Pwerteng inita karong mga panahona. Nunot niini ang mga balita kalabot sa mga gubat ingon man ang walay pagsinabtanay ingon man ang kagubot mismo sulod sa mga mahinungdanon kaayong institusyon sama sa simbahan ug gobiyerno.

Nunot usab ning mga panghitabo ug kainit padayon usab ang pagtay-og nga literal sa yuta gumikan sa linog. Ang linog karong mga panahona, nagbalhin balhin daw nagsuroysuroy sa kalibutan. Murag World Tour ba.

Walay kasegurohan karong mga panahona. Ma ekonomiya, politika ug bisan gani sa natad sa pagtuo ug pag-ampo. Napuno kita sa mga kalibog ug mga kahingawa.

Kining mga butanga nakapaluya kanato sa hilabihan. Kining maong kamatuoran unta makapahigmata kanato nga ang kainit usahay gikinahanglan aron mas mahingpit ug masulayan kita sa atong pagkatawo.

Sama sa bulawan nga sulayan pinaagi sa kalayo. Ang kagubot mahitabo gayud labina kun ang tanan magdumili sa pagpaminaw ug pagsabot sa usag-usa.. Apan kinahanglanon usahay ang panaglalis aron mas makab-ot unta ang malangkubong desisyon.

Apan lahi karong mga  panahona. Malisud ang pag-ila sa kun unsay husto ug kun unsay dili. Kini tungod kay ang bakak gihanigan man og kamatuoran.

Mao kini hinungdan kun ngano daghan ang nahisalaag ug nailad gumikan ning maong pamaagi sa kaaway.  Kun ang tawo nabiktima sa lit-ag malisud alang kaniya ang paggawas gikan niini. Nagkinahanglan siya og tabang.

Nagkinahanglan siya og ayuda Kaniya nga dunay pagtagad sa kahimtang sa biktima.

Ang kainit mahimo untang kainit sa gugma ngadto sa Dios ug kagubot mahimo untang  kalinaw ug kahan-ay!