Gidayeg nako ang mga tagdumala sa balay patigayon diha daplin sa Estero de Parian, ang sapa nga naglumbay sa Colon Street, nga boluntaryong miguba sa kabahin sa ilang building nga anaa gyud daplin sa sapa.
Unya, awhagon nako ang nagdumala sa Gubat sa Baha project ni Mayor Michael Rama, nga gilangkoban sa lainlaing mga departamento sa kagamhanan sa Dakbayan sa Sugbo nga tinud-on paggukod ang wa motuman sa inyong kamandoan.
Adunay karaang mapa nga magpakita nga ang Estero de Parian kaniadto, lapad pa kaayo, apan anam-anam kini nga migamay ug nahanaw na gyud kay gitabonan man sa pipila ka tag-iya og building.
Dunay mga building diha nga gitukod gyud ibabaw mismo sa sapa. Dunay 40 ka building nga gitukod sulod sa three-meter easement gikan sa tampi sa sapa nga supak sa balaod.
Gihatagan na sila og ultimatum nga kinahanglang gub-on na gyud ang kabahin sa ilang building nga anaa sulod sa three-meter easement sa sapa. Ang uban wa manawat sa final demand letter.
Anhi dinhi masukod kun may ngipon ba gyud ang City Hall nga mopatuman sa balaod. Kabahin sa Colonnade nga mitabon sa sapa sa ilang grocery, gireport ko kini kaniadto, apan ang hepe sa Office of the Building Official (OBO) nagpadingol-dingol lang.
Nagduda lang hinoon ko kay nganong igo ra man siyang moingon nga adto kuno ko sa Barangay Santo Niño moreklamo kay sakop ni sa ilang teritoryo.
Mao na nga nakaingon ko nga bisan pa og ang mga mayor nindot og plano alang sa siyudad, apan kun ang iyang mga sinaligan, pakloy ug kangkang lang ang kamot nga modawat sa sweldo, ug tingali sa mga “padangog,” aw wa gyuy mahimo.
Kini si retired General Mel Feleciano nga maoy gitudlo ni Mayor Michael Rama isip chief implementor sa Gubat sa Baha, motrabaho ni basta hatagan lang og gahum sa mayor.
Unsaon man nato pagpalawom ug pagpalapad sa sapa kun anaa kanang mga building nga gitukod sa three-meter easement? Ilabi na kadtong nagtabon gyud sa sapa?
Mas nindot gyud nga ang kampanya nato sa Gubat sa Baha anha usa nato itutok sa Estero de Parian. Kinahanglang panggub-on ang tanang structure, apil ang mga government structure nga nakalapas sab sa balaod.
Kun dili apilon ang mga estraktura sa kagamhanan nga anaa sab sulod sa three-meter easement, dili kini makiangayon ngadto sa ubang maapektohan sa kampanya.
Busa, kinahanglang patas ang pagpatuman. Matud pa sa eningles, “Without Fear and Favor.”