Gubat patani sa 2025
Karong nikumpisal na si First Lady Liza Araneta Marcos nga nasuko siya ni Bise Presidente Sara Duterte Carpio kay nitambong sa rally sa Davao City diin gipasanginlan ni kanhi Presidente Rodrigo Duterte nga bangag si Presidente Ferdinand Marcos Jr. naklaro na nga plastikay ang pagpreserbar sa UniTeam.
Kon saktong pangagpas nga dako ang papel ni Liza sa mga desisyon ni Marcos, di na mabalik ang panaghiusa sa duha ka pamilya. Kay wa man mapahilom sa iyang bana, tinuod gyod tingali nga si Liza mao ang hawod sa administrasyon.
* * *
Nga napamatud-an sa mga gihimo ni Marcos:
• Malakanyang maoy nihatag sa House of Representatives sa mga dokumento sa pagpangayo ni Sara og confidential funds bisan way budget item ang Office of the Vice President (OVP) para ini niadtong 2022, nga niresulta sa pagbisto sa Commission on Audit nga gigasto ni Sara ang P125 milyones sud lang sa 11 ka adlaw; ug
• Way gihimo si Marcos sa pagbaraw sa iyang mga alyado sa House ug Senado nga nipapas sa P650 milyones nga confidential funds ni Sara sa Department of Education ug OVP.
* * *
Nga gibawosan ni Sara, bisan sa pasalig nga padayong nagsuporta ni Marcos, pinaagi sa:
• Pagpasangil sa mga nisupak sa iyang confidential funds (nga naglakip sa presidente) nga kontra sa kalinaw ug sa nasud;
• Pagsaway sa gibanhaw ni Marcos nga sabutsabot sa kalinaw uban sa mga rebeldeng komunista; ug
• Pagdumili pagbakwi sa mga pasangil sa ilang pamilya ug mga alyado nga ang presidente adik sa ilegal nga drugas ug angay lang nga pulihan na niya sa puwesto.
* * *
Silang Marcos ug Sara niangkon nga sila na lay managhigala. Ang asawa ug mga alyado ni Marcos niapiki na sa mga Duterte. Ang amahan ug mga igsuon ug mga alyado ni Sara bantang nang nangampanya sa pagpalagpot ni Marcos sa Malakanyang.
Di molurang kon dili mas mograbe pa ang away sa mosunod nga mga adlaw. Nga moresulta sa pag-ulbo sa gubat-patani sa lokal ug nasudnong eleksiyon sa Mayo 12, 2025. Kanus-a ang mga Marcos ug mga Duterte magpadaghanay og mapadaog nga mga senador, mga kongresista, mga gobernador ug mga mayor. Aron makabentaha sa eleksiyong presidensiyal sa Mayo 2028.
* * *
- Latest
