Medical mission

Aniay maayong balita alang niadtong mga lumulupyo sa lungsod sa Liloan ug sa silingang mga lugar kinsa dugay nang naghambing sa mga nagkalainlaing balatian sa ilang mga mata.

Adunay usa ka foundation nga mopahigayon og medical mission didto sa maong lungsod sulod sa pipila ka adlaw sa sunod semana.

Ang Eye, Hear Foundation molusad og mga pagpang-opera alang niadtong adunay balatian (cataract ug pterygium) sa mata sa maong lungsod ug kasikbit nga lugar gikan sa April 22 (Lunes) hangtud sa April 24 (Miyerkules).

Hinuon mipahibalo ang mga organizer nga adunay gamay’ng bayad ang mga pasyente. Kini alang usab sa kantidad sa lente ug medisina. Ang bayad naglangkob sa P2,000 alang sa pterygium surgery ug P3,500 alang sa operasyon sa katarata.

Sa dili pa ang operasyon, adunay screening nga ipahigayon sa mga pasyente karong Domingo nga magsugod sa alas siyete sa buntag. Kini adto ipahigayon sa simbahan sa Pastoral Center of San Fernando Rey sa Barangay Poblacion.

Tungod sa grabe’ng kainit sa panahon nga posible nga motumaw sa mga adlaw sa medical mission, giawhag sa mga organizer ang gustong mo-avail sa maong mga operasyon sa pagdala og tubig nga mainom.

Kining maong kalihokan usa ka dako nga oportunidad alang niadtong dugay nang naghambin og mga balatian sa mata. Dili kini angay palabyon tungod kay mas grabe ka mahal kon adto magpaopera sa mga hospital, wala pay labot sa gasto sa tambal.

Busa angay timan-an ang petsa sa maong medical mission. Kadtong gusto nga mo-avail niini kinahanglang nga magsayo alang sa screening karong Domingo.