EDITORYAL - Ayuda angay patuboon

Ang pagpamenus sa gidaghanon sa mga kabus usa sa mga nag-unang sulbarunon sa matag dunay bag-ong molingkod nga presidente sa nasud.

Apan kada presidente, aduna silay kaugalingong mga pamaagi o programang gustong buhaton para sa mga kabus aron sila matabangan ug mahaw-as gikan sa ilang kahimtang.

Ang dakong pangutana kun epektibo ba kini? Tinud-anay ba gyung nasalbar sila aning mga programaha ilabi na kanang gitawag nga mga cash assistance o ayuda kada buwan?

Dili ba kaha, ang natabangan lang niini kadtong mga ginikanan nga maoy direktang tigdawat sa kwarta sa gobiyerno tungod kay nakakita na sila og maayong panginabuhi natangtang na sila sa listahan sa mga benepisaryo.

Kumusta man ang ilang mga anak? Wala ba kaha sila napud maoy sunod nga nagpa-enroll anang mga programaha? Partikular niini kaning Pantawid Pamilyang Pilipino Program sa DSWD?

Lisod kaayong haw-ason ang mga kabus sa gikahimutangan niini karon kun ang programa mopokus lang sa lang kaonon karong adlawa. Kaning ayuda nga kutob ra tanan sa baba ug tiyan, makapahimo kana nga tapulan sa mga tawo.

Ang programang epektibo, mao ang pagtudlo kanila og mga negosyo gamit ang kung unsay kasagaran nga naa sa lugar diin sila magpuyo ug palambuon kini aron makwartahan. Aning paagiha, sila mismo ang modumala sa ilang ginagmay nga negosyo ug kay silay nasuhito sa ilang dapit makapangita sila og mga pamaagi o inisiyatiba aron mapadako kini.

Sa laktod, kanang dole-out nga kwarta o ayuda, gamiton pang puhonan. Kay ini og dagan sa mga buwan makaginansiya sila ug mabalik ra ang kwarta ug modako sab ilang kapital ug di na unya sila magsalig pa sa itunol sa gobiyerno.

Dako og papel niini mga ahensiya sa gobiyerno nga gitahasan aning mga programaha.

Kinahanglan sab nga dunay kooperasyon ang mga lokal nga kagamhanan sa mga nasudnong ahensiya kung diin nagpuyo kining mga benepisaryo aron pagtabang pagpasabot ug pagkombinsir kanila nga mas importante ang kahibalo sa pagpanginabuhi nungka sa pagdawat lang sa ayuda nga padung ra tanan sa baba.