Kaning grabeng nasinating kainit sa panahon nga nihamok sa tibuok Pilipinas nakaukay sa nagkalain-laing ideya kun unsaon pagpamenus sa negatibong epekto niini sa panglawas sa tawo, gikan sa pag-inom og daghang tubig, dili pagpalabi painit sa adlaw ug pag-usab sa mga eskedyul sa mga trabaho nga dili sa panahon nga taas na ang adlaw.
Apan duna usab sa mga sugyot nga samtang ka importantesab para sa mga tawo, medyo makaisa gamay og kilay.
Kini mao ang sugyot sa mga doktor ug eksperto sa panglawas nga dili pasul-ubon og panty ang kababayen-an kun naa ra sa ilang mga balay.
Kini aron matud pa presko ug maiban-ibanan ang kaalimuot ilabi na sa mga kababayen-ang humok matakboyan og yeast infection ug uban pang sakit dala sa kagaw.
Ang sugyot kun gikan lang sa mga yanong tawo mura og bugalbugal, apan kay gikan man kini sa usa Kongresista sa Iloilo nga si Rep. Janette Garin kinsa kanhi Department of Health Secretary kaniadto dili kini angay himuong kataw-anan.
Si Garin nga kanhi doktor nga karon usa na ka magbabalaod mihatag sa iyang sugyot isip usa ka batid mananambal.
Kini tungod kay ang yeast infection usa ka seryusong sakit sa kababayen-an nga mahimong magdala og komplikasyon sa panglawas.
Tingali sa uban dili importante kanila kun magsuot o dili og panty tungod kay airconditioned man pirme ang ilang nahimutangan o presko kaayo ang ilang pinuy-anan ug dili sama sa kaalimuot sa ubang mga lugar.
Apan ang tambag ni Garin dili kini para kanila, kondili, para kini ngadto sa mga kababayen-ang exposed kaayo sa negatibong epekto aning pagsaka sa temperatura dala sa El Ni o phenomenon.
Naa na sa mga nakadungog o nakabasa sa sugyot ni Garin kun ilahang sundon. Ang importante niini ang tumong sa iyang sugyot para sa kaayohan sa panglawas sa mga babaye.