Ang voyeurism

Unsa ang voyeurism? Ang Oxford nga diksyonaryo mipasabot nga ang voyeurism usa ka praktis sa gana sa sex pinaagi sa pagtanaw sa uban nga hubo o naglambigit sa sekswal nga kalihokan.

Tungod sa kadaghang kaso sa voyeurism, ang Kongreso mipalabang sa Akta Republika Numero 9995 o Anti-Photo and Video Voyeurism Act of 2009.

Ubos ning maong balaud, ang photo o video voyeurism nagpasabot sa akto sa pagkuha sa litrato o video coverage sa usa katawo o grupo sa mga tawo nga naghimo og sekswal nga buhat o bisan usa nga susama nga kalihokan o sa pagkuha og hulagway sa pribadong lugar sa usa ka tawo o mga tawo nga walay pagtugot sa naulahi, ubos sa sirkunstansiya nga ang mga tawo adunay makatarunganon nga pagpaabot sa pribasiya o ang buhat sa pagbaligya, pagkopya, pagbroadcast, pagpaambit o pagpakita sa litrato o video coverage o mga rekording sa maong sekswal nga buhat o susamang kalihokan pinaagi sa VCD/DVD, internet, cellular phones o susamang paagi o device nga walay sinulat nga pagtugot sa tawo bisan pa nga ang pagtugot sa pagrekord o pagkuha sa litrato o video coverage sa mao nga gihatag sa maong mga tawo.

Mao ni ang balaud nga gibasihan sa abogada nga pasahero sa iyang pagpasaka og kaso batok sa commissioner sa National Labor Relations Commissions.

Sa asoy sa abogada, gikuhaan og hulagway sa commissioner ang pribadong parte sa iyang lawas samtang sakay sila sa eroplano. Giasoy sa abogada nga samtang nagpundo siya sa agianan sa eroplano tungod kay ang iyang nasundan daghan og gikarga, nagpunay pud diay og kuha og hulagway sa pribadong parte sa iyang lawas. Gipanghimakak sa commissioner ang pasangil sa abogada.

Samtang dautan ang paghimo og voyeurism mas maayo pod nga likayan sa kababayenan ang pagsulob og mga sapot nga makapatental sa pananaw sa kalalakinan.