Ikatulong Pulong

Nunot sa labihang kainit sa El Niño nga atong nasinati ning mga adlaw nga angay natong pamalandongan ang kataposang Pito ka Pulong ni Hesukristo nga Iyang gilitok itaas sa krus, nagkagrabe sab ang kainit sa ulo sa katawhan.

Tingale tungod ning gipakitang talagsaong taras sa atong kadagkoan karon, nga sige ra'g panggukod sa ilang mga kaaway sa politika.

Nakaapekto kini sa milyonmilyong katawhan nga anaa sa ilang ubos. Nga inay ilang atimanon, bisan makakaon man lag husto ug matabangan nga makaangkon og kaugalingon balay nga kapuy-an, napasagdan na lang intawon. Mao nga iya-iya na lag diskarte ang napiit sa kapait. May nag-drug pusher, swindler, walker, dancer, hold-aper, vlogger, rapper ug uban pa.       

Sama ni rapper Range 999, kinsa misikat tungod sa iyang mga rap songs. Apan makapasubo. Medyo miawop iyang kahayag dihang gipusil niya ang usa ka Amerikano gawas sa usa ka bar.

Tungod kay matud niya, gibinastosan kuno iyang mga seksing amiga. Gikuot ang sampot sa naasoy'ng langyaw. Mao nga napusilan. Ang nakapait, kay namatay ra ba gayod sa ospital. Ug mahimong makasohan siya'g murder.

Makonektar nako kining hitaboa sa ikatulo ka Pulong nga gibilin ni Hesus ngadto nila ni Birhen Maria ug Pedro: “Babaye, anaa ang imong anak. Anak, anaa imong inahan.”

Dinhi, gipasabot ni Hesus nga dungan unya sa pagtukod ni Pedro og Simbahang Katoliko, kinahanglang ipaila-isangyaw sa tibuok kalibotan nga dili lang si Birhen Maria maoy inahan ni Hesus. Kondili, inahan natong tanang katawhan. Busa, angay tahuron ug sundon ang mga langitnong hiyas nga anaa sa iyang pagka-inahan.

Ug ngadto kang Maria, gitahasan siya ni Hesus sa pagpadayog amuma, matuto ug pagmahal sa tanang katawhan, isip iyang mga anak, sama sa iyang pagpadako ni Hesus subay sa kabubut-on sa Diyos nga Amahan.

Sa laktod, misyon sa tanang iinahan ang pag-alima sa mga anak, gikan sa pagkahimugso hangtod pagkadako, nga magtubo kini pinaagi sa pagsunod ug pagpasunod sa mga sugo sa atong Ginoo. Ug misyon sa tanang anak, ang pagtahod-pagsunod sa atong inahan, kinsa nagmasinugtanon kanunay sa atong Magbubuhat-Manluluwas.

Kay kon kini gituman pa, dili unta makahimog krimen si Range. Sanglit hunghongan man siya sa Espiritu Santo: “Range, gidili ang pagpatay!”