Lakang vs mercury dental amalgam

Ang grupo nga BAN Toxics mipadayag og alarma sa padayon nga pagbaligya sa ginadili nga mercury dental amalgam sa merkado ug online sa nasud.

Sa usa ka market surveillance nga gihimo niini, ang grupo nakapalit ug nagdokumento sa mga tigbaligya sa mercury dental amalgam sa dental supply stores sa Manila ug ingon man sa mga online store.

"Kining maong kalamboan nakapaalarma," matud ni Thony Dizon, Toxics Campaigner sa BAN Toxics. "Gitawag namo ang atensyon sa mga tindahan sa suplay sa ngipon ug mga platform sa online shopping aron higpit nga sundon ang regulasyon  ug tangtangon dayon gikan sa mga estante kining maong mga butanga."

Ang Department of Health (DOH) miisyu sa Administrative Order No. 2020-0020 o ang "Guidelines on the Phase-out of Mercury Use in Dental Restorative Procedures sa 2020. Ang AO naglangkob sa pag-phase-out sa importation, distribution, manufacturing, pagtipig, transportasyon, pagdumala, paggamit sa mga dental amalgam sa Pilipinas.

Ang Food and Drug Administration miisyu usab sa FDA Circular No.2022-003 nga nagdili sa tanang mercury-added thermometers, sphygmomanometers, dental amalgam capsules ug liquid mercury nga  gamiton alang sa dental restorative purposes.

Ang dental amalgam, nga kasagarang nailhan nga silver fillings, gigamit sa pag-ayo sa nangadunot o nabali nga ngipon. Kasagaran kini adunay pilak, lata, gamay nga kantidad sa tumbaga ug zinc, ug mercury.

Ang mercury, matud sa World Health Organization, usa sa nag-unang napulo nga kemikal nga adunay dili maayong epekto sa lawas sa tawo ug sa kinaiyahan. Ang kemikal makaapekto sa atong mga nervous, digestive, ug immune system.

Ang grupo nga BAN Toxics misulat ngadto sa Food and Drug Administration/Department of Health ug sa Department of Trade and Industry aron i-report ang maong butang ug irekomendar ang pagkumpiska aron mahunong na ang pagbaligya sa mercury dental amalgam.