Nagtakdo ang hunahuna

Gisaway ni kanhi Cebu City Mayor Tomas Osmeña ang pipila ka mga opisyal sa daybayan ug lalawigan sa Sugbo tungod sa pagsugyot sa pagpahunong sa gitrabaho nga Cebu Bus Rapid Transit (CBRT). Gisultihan sa kanhi mayor si Konsehal James Cuenco, mga sakop sa Hunta Provincial ug Gobernador Gwendolyn Garcia nga dili insultohon ang naghatag og pundo sa dako nga proyekto nga nagkantidad og bilyones ka pesos sama sa CBRT.

Nagkanayon ang kanhi mayor nga mahimong mas grabi pa ka bati sa nasud nga Pilipinas ang dakbayan sa Sugbo kun ipahunong ang CBRT nga proyekto tungod kay I-blacklist na unya kini sa mga donor nga mga nasud sama sa Japan, Germany ug England.

Kaniadtong Pebrero 21 gipanawagan ni Cuenco atol sa iyang privilege speech sa session sa Konseho sa dakbayan sa Sugbo ngadto sa Department of Transportation (DOTr) ang temporaryong pagpahunong sa nagpadayon nga trabaho sa CBRT samtang dili pa maporma ug magabot ang mga sakop sa Technical Working Group niini.

Bag-ohay pa pod nga mipalabang og duha ka mga resolution ang mga sakop sa Hunta Provinsiyal sa lalawigan sa Sugbo nga nag-awhag sa pagpahunong sa gitrabaho nga CBRT tungod kay nakalapas kini sa Heritage law.

Giklaro sa kanhi mayor nga walay ngipon ang hunta sa pagpahunong sa proyekto tungod kay murag sila ang naningkamot para sa proyekto.

Samtang sa resolution nga gipalabang ni Konsehal Nestor Archival nga nagsugyot sa mayor ug sa gobernador nga magtagbo alang sa usa ka dialogo aron subaron ang suliran, gipadayag ni Cebu City Mayor Mike Rama nga wala kini kinahanglana tungod kay ang CBRT proyekto sa dakbayan sa Sugbo ug dili iya sa lalawigan sa Sugbo.

Giklaro sa mayor nga kun may mosulbad man niini, ang nasudnon lamang nga kagamhanan ug ang dakbayan sa Sugbo. Mora'g nagkatakdo ang huna-huna nila ni Mayor Mike Rama ug kanhi Mayor Tomas Osmena ning isyu sa CBRT. Ngano ba pod nga magapil-apil man sa CBRT nga proyekto ang lalawigan sa Sugbo nga dili man ni ilang proyekto.