Molusot nga walay langas

Gidepensahan ni Agriculture Secrertary Laurel ang OIC sa Bureau of Animal Industry human kini giakusahan og harassment sa usa ka importer kay gipugngan sa naulahi ang pag-release sa 400 ka manok igtatari.  Matud ni Laurel, ang pagpugong pag-release usa ka standard precautionary measure aron kalikayan ang pagkuyanap sa avian influenza. Alang sa consignee, harassment ang gihimo sa BAI kay kompleto ang ilang papeles sa maong importasyon.  Matud pa sa akong amigo, “Tataw nga walay padrino sa gobiyerno ang importer. Kay kon aduna pa, sama sa sibuyas-bombay, asukal ug bugas, molusot lang kini nga walay daghang langas.” Madahaan!

Maantigo’ng motago

Misaka karon ang wholesale price sa tamatis nga gibaligya sa Nueva Viscaya Agricultural Terminal (NVAT).  Kining pagsaka sa presyo nahitabo human sa gikataho nga pagpanglabay sa mga tamatis niadtong Disyembre 2023 tungod sa naghinobra’ng supply.  Mora’g adunay kakulang sa tambayayong nga pagplano tali sa gobyerno ug sa mga mag-uuma aron malikayan ang pagpangdam-ok/pagpanglabay, o ba kaha, ang tumang pagsaka sa presyo.   Makagaba ang magsige’g panglabay sa abot sa yuta.  Kay ginaingon man nga “Bisan ang tamatis maantigo’ng motago sa iyang kagul-anan ug malisod mo’ng suta-on ang daut sa iyang kahiladman.”vMuleeng!

Katin-awan o kalibog?

Nagmakuli gihapon ang kagamhanan sa dakbayan sa Sugbo sa pag-bakante sa MCWD Building nga gigamit niini isip satellite offices bisan pa man sa pagpapahawa niini sa MCWD.  Daghan ang hinungdan ang gibatbat sa City Legal Office sa pagmakuli pagpahawa sa dakbayan.  Tungod ni’ng bag-ong kalambuan, tataw nga mahidangat kini sa korte, butang nga angayan buhaton aron mahusay kining maong kontrobersiya.  Mientras tanto, sa pamantalaan lang una ipadayag ang argumento sa matag habig diin walay kasegurohan kon katin-awan o kalibog ba kaha ang mahatag sa katawhan.  Fezteleern!

“Hidden wealth” na unta

Ubos sa DOLE Department Order No. 242, series of 2024, isip katin-awan sa IRR sa Service Charge Act (R.A. 11360), ang tanan’g empleyado makadawat na sa kinatibuk-ang kantidad (100%) sa natigom nila nga service charge.  Nagpasabot kini nga madugangan na ang ilang take-home pay kay dili na man apil ang employer sa binahinay sa service charge nga matigum.  Pro-labor unta ang maong balaodnon apan wala kaayo kini gikahimuot sa akong amigo.  Alang kaniya, maayo unta nga wala ibalita ang maong kalambuan, kay aron dili mahibaw-an sa iyang asawa kay lage, “Hidden wealth na man unta kuno to”.  Gibangkong!

Bonus lang ang sakalam

Gisaulog sa dakbayan sa Sugbo ang 87th Anniversary sa Charter Day nga gitapos kagahapon’g adlawa sa usa ka programa ug wreath laying atubangan sa estatuwa ni Don Vicente Rama sa City Hall.  Mabatyagan nga dili kaayo mainiton ang pagpaminaw sa katawhan sa mga pakigpulong atol sa programa kay usahay awhagon pa man sila sa pagpakpak.  Apan sa dihang gihisgutan sa Mayor ang Charter Day Bonus, mikalit paghugyaw ang katawhan, labi na ang mga empleyado.  Makabungog ang ilang siyagit ug pag-abiba nga daw ang kamahinungdanon sa selebrasyon sa Charter Day napatigbabaw lang kon adunay ihatag nga bonus.  Madahaan!