Ang adlaw sa paningil

Binasa sa: Mat. 25;31-46

Pagpamalandong sa Malangkubong kaayohan

Nahimo kitang komportable sa mga hilisgutan kalabot sa espirituhanong paglambo apan nahikalimot kita sa mas praktikal nga pagpamuhat alang sa atong mga kaigsuonan sa atong palibot.

Sayud kita nga daghanan kanato ang nalisang gyud sa sin of commission apan nahikalimot kita sa atong mga sipyat diha sa sin of omission nga kasagaran atong nahimo.

Wala kitay kaikag nga manginlabot. Diha sa atong ka busy sa pagtukod og mga istraktura ug mga programa nahikalimot kita nga mas mahinungdanon diay ang pag-ila sa presensiya sa Dios diha sa bayhon ug dagway sa atong mga kaigsuonan.

Sa laing bahin, atong himoon nga makita nato nga matag adlaw kasinatian sa presensiya sa Dios.

Ug sa atong pagsulod ning maong presensiya niya, mamahimong Diosnon usab ang tanan nga atong gihunahuna, gibuhat ug gipamulong.

Lisud kaayo dawaton nga atong gidayeg ang Dios apan pakyas kita sa pagpakita og gugma sa atong isigkaingon.

Ang mga nangangkon nga gihigugma niya ang Dios nga dili makita apan pakyas sa paghigugma sa mga tawo nga makita ang pagaisipon man nga bakakon.

Sa panahon nga gitakda kita makig-atubang sa Hari ug sa maong pag-atubang dili na kaluoy ang anaa hinunoa ang kaangayan. Madawat nato ang bugti segun sa atong binuhatan.