Gihimo ni Quiboloy husto

Makapahinuktok. Ang Senado pandayanan lamang og mga balaod. Pero segun sa atong himatikdan, mora'g gihimo na hinuong korte sa mga abusadong senador (hinuon dili tanan. Kana kon may nagpabilin pang tarong nga dili matental sa tinagingting sa salapi?)

Tinuoray, trabaho nila ang paghimog imbestigasiyon sa mga public servants nga nakahimog salaod nga makadaot sa katawhan ug atong nasod. Pero angay hinumdoman. Igo ra sila pag-utingkay sa mga butang nga angay utingkayonon aron masayran kon aduna ba gayoy nalapas nga balaod ang maong public servant?

Diin, kon ugaling sa ilang pag-imbestigar may mga lungag o buslot silang makit-an nga maoy gigamit nga lutsanan sa giimbestigar, makahatag kini nilag ideya pag-umol og dugang epektibong balaod nga lig-ong motabon sa maong buslot aron wala nay giimbestigarang idlas o danglog nga makalusot.

Ang tumong sa pagpahigayog imbestigasiyon sa Senado mao ang ‘in aid of legislation’ lamang. Aron sila matabangan ug magiyahan sa unsay pulido pang balaod nga angay nilang pandayon. Pero, hukman ang giimbestigar nga sad-an? Sa judiciary body na kini: from lower to Supreme Court of Justice.

Mao nga salikwaot kaayo kining pagpadala sa Senate Committee on Women and Children og subpoena batok kang Kingdom of Jesus Christ leader, Pastor Apollo C. Quiboloy sa padayong giimbestigahang nahimo kuno niining krimen.  Angay hinumdoman nga si Quiboloy usa ka pribadong citizen.

Ug dili usa ka public servant nga maobligar sa Senado sa pagtungha aron latigohon taman sa ginhawa sa daw one-sided nilang alegasiyon. Diin, maminaw man tuod sa seryosong mga pamahayag sa giimbestigar pero ang ila gyong habig maoy masunod. Kini base sa unsay nahitabo niadtong P1.8B House  speaker travelling expenses controversy nga bisag gipaagig pangutana ni SMNI Laban Kasama ang Bayan host Ka Eric Celiz kon tinuod ba kini? Pastilan, gi-cite in contempt hinuon!

Busa, mabasol ba si Quiboloy kon i-isnab ilang subpoena? Andam man kanunay moatubang si Quiboloy sa bisan unsang kasoha nga isang-at batok kaniya. Basta, adto lang sa proper court ipahigayon ang patas-walay kinikilingkilingan nga away. Pero, anha sa Senado? No, way!

Hinungdan, katilingbang nagpakabana, kinsa nawad-an nag pagsalig sa Kongreso ug Senado, kinasingkasing misimpatiya ni Quboloy. Misaludo ug nakaingon: “Husto ang gihimo sa pastor.”