Minyo ang karelasyon

Dear Atty. Divine,

Aduna koy karelasyon sud na usa ka tuig. Karong bag-o akong nahibaw-an nga minyo diay siya kaniadto apan nagbuwag sila sa iyang asawa ug duna silay usa ka anak. Wa mosulti kanako ang akong karelasyon labot sa iyang sitwasyon ug nahibaw-an nalang nako kini pinaagi sa among common friend. Ang akong gikahadlokan kun masayud ang iyang asawa labot sa among relasyon. Unsay angayan nako nga buhaton? Kun mahibaw-an kini sa akong trabahoan nga minyo ang akong karelasyon posible ba kining kabasihan sa pagtaktak nako sa  trabaho? Daghang salamat. -- Nena,

Dear Nena,

Ang una nimong buhaton mao ang pag-confront sa imong hinigugma kun nganong wa siya mosulti kanimo sa iyang matuod nga estado. Bisan tuod kun nagbuwag na sila sa iyang asawa apan kun wa ma annul ang ilang kaminyuon, nagpabilin silang kasado ug usa ka kalapasan sa balaod ang iyang pagpakigrelasyon kanimo samtang nag exist pa ang iyang previous marriage. Ang iyang legal nga asawa mamahimo usab nga mo-file og kasong concubinage batok kaniya ug mamahimo sab kang malakip sa maong kaso. Busa, aron paglikay sa maong legal nga problema, mas maayo nga imong putlon ang imong relasyon ngadto kaniya. Ang imo sab nga pagpakigrelasyon og minyo mamahimong kabasihan sa kompaniya sa pagtaktak kanimo sa trabaho basi sa Article 297 (282) sa atong Labor Code. Kini tungod kay  ang usa ka empliyado nga makahimo og serious misconduct sama sa Immorality mamahimong  ground nga i-terminate siya kay nahasupak kini sa atong moral standards. Thank you and God bless. -- Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.