Kingluckss, ni Tatay nakapahilak

Grabe kapaspas ang social media karong panahona. Lalim bay, wala pa gani mapatik akong artikulo dinhi sa atong lindog nga giulohag: ‘Kabaw namatay, angay tabangan si Tatay’, may manggiluy-ong vlogger sa pangalang ‘kingLuckss’ ang mitunol gilayon sa iyang hinabang ngadto sa hingtungdang mag-uuma, kinsa tungod kay wala kapugngi ang labihang kaguol, mitupad paghigda sa namatay niining kabaw human mabakunahi didto sa Naga City Veterinary Office, Enero 25, 2024.

Base sa iyang pangdukiduki, nasayran sa vlogger unsa ka pinangga sa tigulang mag-uuma ang nahisgotang kabaw, kinsa matod pa, hapit maghikog tungod sa tumang kasubo ug maayo na lang, nga napugngan sa iyang mga anak.

Si Tatay mitug-an nga wala siya makatiwas og Grade 1, nagbata sa pagpanguma ug wala nay asawa, diin human mahinol sa vlogger ang kubalon palad ni Tatay, nadugangan ang  kaluoy niyang gibati.

Busa, tapos sa unang interbiyu ni Tatay, pagbalik sa vlogger, dala na niini ang mga sorpresang hinabang niyang gisaad nga mao kini: sinakong bugas, dakong karton ug mga plastik nga puno sa groceries. Ug gitunolan pag P20,000 cash si Tatay. Nga daw nakapaamang kutob sa kinsay nakasaksi sa maong talan-awon.

Unya, sa ikaduhang higayon, gitabonan na sab og panyo sa vlogger ang mga mata sa mag-uuma dungan ang pag-ingon: “Tay, dili na man ta magkita, maghatag lang kog remembrance nimo, ha?” Dayon, gikuha-guyod sa vlogger ang maong remembrance paingon ni Tatay. Ug human pakupti ang pisi, gitangtang niya ang salipod sa mga mata niini ug maoy nakuwadro sa panan-aw ni Tatay ang dili niya malimtang bililhon kaayong handumanan gikan sa usa ka Samaritanhong vlogger – ang bag-ong kabaw nga nagkantidad og P63,000.

Dili kay mga luha ra ni Tatay ang gipatulo ni kingLuckss vlogger. Hasta mga sensitibong kasingkasing sama sa akoa, nagisi ug mihilak usab. Dako kining hagit ngadto niadtong mibakuna-patay sa unang kabaw ni Tatay ug ni Naga City Mayor Valdemar Chiong, kinsa unang gihangyo sa hingtungdang pamilya nga motunol sa ilang panabang.

Ug bisag aduna nay nakaunang mitabang, unta magmadasigon gihapon ang Naga City officials pagtunol sa ilang kaugalingong hinabang. Kay kadtong nagtanom og maayong buhat, makapupo sab baya og maayong bunga.  Samot, pag-abot sa 2025 mid-term election!