Leksiyong matuhog sa 2024 Sinulog

Tres milyones kapin ang misaksi-nanambong ug miapil sa daw panon sa mabagang sulom nga misungasong sa naglagiting nga kainit sa adlaw sa miaging 2024 Sinulog Grand Parade sa South Road Properties (SRP)? Makalipay’ng ebidensiya kini nga ang maong tinuig kalihokan, taliwala sa mga tawhanong pagsulay, nagmalampuson!

Ang paghagkanay sa mga palad sa atong Mom and Dad: Cebu Governor Gwen Garcia ug Cebu City Mayor Mike Rama sa miaging Enero 14, 2024 Sinulog sa Kabataan ug ang pagtambong-suporta ni Gov. Gwen sa Enero 21, 2024 SRP Grand Ritual Showdown, nakahanaw sa  kahingawa kanatong ilang mga anak ug maoy mipuli sa atong kasingkasing ang dili matukib nga kalipay.

Hinuon, bisan unsa kamalampuson ang usa ka event, aduna gyoy manggawas negatibong reaksiyon. Sama sa usa ka balikbayang atua na puyo sa Germany, kinsa pinaagi sa Facebook page, mipahungaw sa iyang kadismaya. Init kuno kaayo ang SRP, luoy tanang contingents, sobra ra kalayo ang hotel nga ilang giestaran didto sa downtown, diin safety-dali ra unta madala iyang gagmayng mga anak ug tigulang nang Mama kon wala pa lang usba ang venue.

Normal ra kining komentariyoha. Kay sama sa bag-ong pinalit sapatos, mabaghoan gayod imong tiil, labi nag maluthan ka. 

Apan tugoting aniay pipila ka leksiyong atong maani sa 2024 Sinulog: Ang Cebu City Sports Center (CCSC) giila nang icon venue sa tinuig Sinulog Grand Ritual Showdown. Dapat dili biyaan. Hinunoa, dumdomon kanunay! Puwede ra, nga ang Sinulog sa Kabataan anhi dinhi pirme ipahigayon samtang ang Grand Parade ug Grand Ritual Showdown didto sa SRP. Busa, mga banderitas itaas sa kadalanan sa SRP maayong pabagabagaon-padaghanon aron makahatag og dugang landong sa contingents-spectators. SRP venue panindotog samot. Nungkang, maoy isugod pagtrabaho sa mga adlawng atrasawo na kaayo sa pagpangandam. Mga pansayan sa CCSC kulang na sa pagtagad. Unta imintinar ang katahom-kalimpiyo.

Ang 20 contingents sa Ritual Showdown mihatag og hustong numero aron ang pasundayag dili maabot og kaadlawon. Usab, ang gilay-on sa pagalaktan-sayawan sa nag-Sinulog parade ma-adjust aron kalikayan ang gidaghanon sa makuyapan. Ug ang pamilyang magkabahinbahin dili gyod magmadaugon sa gitinguhang makab-ot. Pero kon kanunayng nagkahiusa, magmalamposon gayod. Salamat, Gov. Gwen ug Mayor Mike, niining inyong pagkahiusa!