Wala kahay ma-exempted sa gidiling inom?

Maghisgot gani ta'g kapiyestahan, mao dayoy atong mahulagway ang grabeng hinikayay sa mga tagbalay. Gani bisan ang uban nga walay ikapalit og para kombira, mangutang gyod para adunay ikadalit sa  mga bisita.

Kon dunay kaon, anaa poy inom: softdrinks, beer, o ubang matang sa ilimnong makahubog. Kantakanta, sing-along ug sayawsayaw, mag-uban gyod na. Kay piyesta lagi!

Ang nakaporke, kay naay tawo nga kon masobraan sa inom, mahimong war-freak. Dili na makailag amigo. Kutob sa mopugong aron dili kini makabuhat og daotan, unayon pa hinuon pagluthang-patay sa nagmaoy. Resulta? Ang botelya sa tanlas nga bino nabuak ug napasad-tipon sa mibanawng dugo sa kagul-anan.

Mao kini ang gilikayan ni Cebu City Mayor Michael ‘Mike’ Rama sa umaabot natong pagsaulog sa 2024 Sinulog Festival gikan sa kadalanan paingon sa entabladong giandam didto sa South Road Properties (SRP) alang sa pag-indigay og Sinulog dance nga giapilan og 20 ka contingents gikan sa nagkadaiyang dapit sa Sugbo ug sa gawas sa Sugbo. Usab, may taga South Korea nga mo-join isip guest.

Sanglit base sa mga nangaging Sinulog Festival, diin libre rang mag-inom, mag-street parties ang mga goodtimer, may mga dugoong insidenteng nahitala sa kasaysayan, ug gani, segun sa akong mahinumdoman, duna pay mga hubog mamahid og binasang abo sa nawong sa mga nasugatang manan-away sa Sinulog.

Busa, naaghat ang mayor pag-implementar og hugot kamandoan nga sa miagi pang mga mayor gipasunod – ang hingpit pag-ban sa tanang ilimnong makahubog sa tibuok siyudad sa Sugbo niining maong adlaw.

Gikan sa gagmay'ng tindahan, bars, clubs, restaurants, tanan gidid-an sa pagpamaligya niini. Ug bisan ang pag-inom sulod sa balay, gi-discourage gihapon, diin kutob sa kinsay masakpan dakpon ug prisohon. Ang pangutana: “Ang bigtime VIP players sa hotels and casinos, kinsa makatayag minilyon kada patad, mapugngan kaha sa hotel and casino management kon mangayog kinig scotch on the rock? Dako baya ang mawala kanila kon ang maong mga dagkong isda mangluod?

Maayo kay sama ni Poncio Pilato, si Mayor Mike nanghunaw. Matod niya, discretion na sa Department of Tourism ang paghukom. Nga haom kaayong makatubag sa dakong pangutana nga maoy giulohan ko sa itaas. 

Right move ba ang naduso sa mayor?