Karong Domingo magkadaghan ang mga sakyanan nga iparking sa lainlaing dapit sa siyudad kay nagsingabot na man ang “Piyesta Senyor” kay saulogon man sa mga Sugboanon ang pangilin ni Señor Santo Niño karong Enero 20 ug 21.
May nangutana nako kon tinuod ba nga dili mapugos pagpabayad sa parking fee ang mga tag-iya’g sakyanan kon sila moparking daplin sa mga karsada sa Cebu City karong Domingo?
Gitubag nako nga “dili mapugos.” Apan wa na ko mopasabot sa akong reply kon ngano kay gikapoyan ko pagpasabot nga ipaagi sa text message, mao nga dinhi nako kini ipasabot.
Kon moparking mo sa inyong sakyanan diha sa mga designated parking area sa siyudad karong Domingo, ug bisan na sa ubang mga Domingo nga dili Piyesta Senyor, ayaw mo pagbayad.
Pwede ra gyud nga dili kamo mobayad kay ang City Ordinance, nagtugot lang sa pagpangolekta og parking fees gikan sa Lunes hangtud sa Sabado.
Ang oras nga gitugot ang pagpangolekta gikan lang sa alas 7 sa buntag ug hangtud sa alas 7 sa gabii. Lapas niini, dili na kamo mapugos sa pagpabayad.
Kon pugson kamo sa pagpabayad, ingna ang collector sa CEPMA, kanang Cebu Parking Management, nga ilegal ang ilang gihimo ug mahimo sila nga mapasakaan og kaso.
Mao ni ang rason nga si Mayor Michael Rama wa na gyud malipay niining gihimo sa Tokagawa Global Corporation, ang tagdumala sa CEPMA, pagkasayod sa mayor nga daghang kalapasan sa pangolekta, nga bisan wa itugot sa ordinansa, nangolekta sila.
Niadtong nangutana kanako pinaagi sa text, pwede ra gyud nga dili kamo mobayad og parking fee atol sa Domingo.
Unta, ang atong mga konsehal sa Cebu City, mohimo og lakang niining abuso sa CEPMA nga bisan wa itugot sa ordinansa nga mangolekta sila sa Domingo, hala mangolekta gyud.
Kon gusto sila nga mangolekta sa Domingo ug sa oras nga lapas na sa alas siete sa gabii, ipausab nila ang ordinansa ug ipaapil ang adlaw’ng Domingo.
Nalooy tawon ko sa akong silingan nga construction worker nga miduaw sa iyang pag-umangkon nga naospital. Pag-abot niya sa ospital, nalipay ang iyang igsuon nga mama sa bata.
Mihangyo nga pulihan siya’g kadiyot sa pagbantay sa pasyente kay mouli usa siya sa balay kay Domingo lagi, manglaba usa siya.
Hapon na nga mibalik sa ospital ang mama sa pasyente, ug abi ninyo, pwerteng dakoa sa nabayran nga parking fee sa construction worker.
Nalooy kaayo ko sa akong silingan ug gihatagan na lang nako og P100 kay mao man kuno ang gipangayong bayad kaniya sa parking collector.