Na-blundered sa venue

Ang daghang katuigan sa nanglabay'ng Cebu City Sports Center (CCSC) Sinulog Grand Parade ug Ritual Showdown namatud-an nga pirmeng gidugok sa minilyong turista (mga lokal man o foreigners), diin naka-fully booked kanunay sa mga gagmay ug dagkong hotel ug giapilan sa nagkalainlaing contingents halos sa tanang kalungsoran.

Ug nganong ibalhin pa man kinig laing venue – ngadto sa South Road Properties (SRP)?  Dili ba ginaingon nga: “Never leave a good home.”? Nahabilyard pa, ‘ipermanenti imong tako, Mayor Mike. Ayaw usba imong tirada!’ Hinuon, sa dulang chess, tungod sa sobrang paminsar og advanced moves, dili malikayan nga siya ma-blundered. Resulta?  Maoy maduso ang false moves.

Ug mao kini ang nahitabo sa atong Grand Sinulog karon. Tungod sa kabalisa ni Mayor Mike nga basin sa nagakadaghan ug magkadaghan pang bisita sa motambong-saksi niini, adunay mahitabong stampede nga delikadog mokalas og mga kinabuhi, nakahukom siya nga adto gayod himoa ang nahisgotang Sinulog sa SRP. Usab, aron pag-introduce sa mga dagkong establisamento sa maong lugar, apil na ang Nustar Hotel and Casino.

Nakalimot siya, nga ning iyang gibuhat, mayoridad sa hoteliers sa uptown, middletown ug downtown ug ubang ginagmayng patigayon nga maoy naandang agian sa nahisgotangi Grand Sinulog, ang nawad-ag daghang kustomer.

Pero kon wala pa lang ibalhin sa mayor ang naandang venue, seguradong magpadayon ang pagdaghan sa turistang motambong. Ug dili angay kabalak-an nga magmingaw ang SRP tungod kay ang dapit nga may hotel and casino, bisan adto pa kini ibutang ilawom sa dagat, dugokon gayod sa mga sugarol, samot na panahon sa mga dagkong okasyon.

Sa laktod, wala untay mausik nga kustomer. Hinunoa, ang mga turista nga mapunta sa SRP, sagad quality guests. Ug kadtong mga tubigtubigang turista nga moawas na sa uptown-middletown-downtown, mahipunta gihapon sa SRP commercial hotels and establishments. Sa ato pa, win-win situation ang maani sa siyudad sa Sugbo.

Niining bag-o, nagplano si Mayor Mike nga makig-heart to heart talk ni Cebu Governor Gwendolyn ‘Gwen’ Garcia. Tingale, aron maplantsa-hapsay ang nalum-it nilang relasiyon. Importante nga mahilot ni Mayor Mike ang nagkalainlaing piang nga atong nasinati ning iyang pagpangalagad.

Buwahan, inig exit unya niya sa City Hall, walay hugawng tunob nga makita ang mosunod-puli kaniya.