Same sex blessing ra diay

Nauyog ang tibuok kalibotan human mibuto ang lanog kaayong balita nga giaprobahan na sa kinatas-ang lider sa Romano Katoliko ang same-sex marriage.

Ang mga magtutuo nga higpit mituman sa kasugoan sa Ginoo naukay-kutaw gayod ilang hunahuna. Daghan ang misupak ug ubay-ubay usab ang nakauyon ning pagpabor sa Katolikong simbahan bahin niining same sex marriage nga gitugot na ni Santo Papa, Pope Francis.

Mga opiniyon ug baroganan nagkabahinbahin-nagkatibulaag. Kay kanus-a ba sa mga panid sa Balaang Kasulatan gitugot sa Ginoo ang same-sex marriage? Gani, kadtong nadiborsiyong kaminyoon, dili man mahimong magpakasal og lain ang asawa o bana kay ang pagbuhat sa ingon usa man ka pagpanapaw.

Hinuon, sa homily ni Fr. Ciano Ubod, siya mipasabot. Nga mahimo rang blesingan o benditahan ang same sex nga nagkaminahalay. Pero iyang giklaro nga kini usa lamang ka sacramental ug dili Sakramento.

 Ang sacramental dili makapapas sa sala. Support ra na siya sa sacrament. Ikaduhang meaning sa blessing, expression of mercy, (pagpaila nga welcome ang tanang magpa-blessing sa pari, daotan, maayo, bayot, lakin-on, lesbian o bisan unsay gender.) Pero kutob ra sa blessing. Kay ang sacrament dili ihatag sa same sex union, sa mga nagpuyopuyo, sa mga divorcee nga wala pa ma-settled ang ilang kinabuhi. Ang sakramento sa kasal maoy makapapas og sala nga seksuwal. Pero ang blessings dili!

Nga sa ato pa, useless lang diay kini. Kay bisag digoon pa sa bendisyon sa pari ang nahisgotang same sex, dili man kini makahugas sa sala nilang seksuwal.

Unta, wala na tandoga ni Pope Francis ang pagdili sa same-sex marriage kay nakahatag rag kalibog sa katawhan. Total, abli man kanunay ang simbahan sa tanang LGBTQ+, kinsa manulod-mosimba ug mag-ampo.

Diin, wala gyoy paring miabog-salikway kanila. Dili ba miingon si Hesus sa Iyang mga tinun-an:  Ingna hinuon:  Oo , kon ang inyong ipasabot  Oo  ug  Dili  kon ang inyong ipasabot  Dili . Ang inyong isulti gawas ini, gikan na sa yawa.  (Mateo 5:37).

Mao kini akong baroganan sa same-sex marriage. Dili ikahimuot sa Diyos kining maong buhat. Ug maarang-arang na lang, nga giklaro ni Fr. Ciano, nga  blessing  ray gitugot sa simbahan. ug dili same-sex marriage.