Daghang pagkaon unyang gabii pagsugat sa Pasko kay sagad sa mga pamilya, bisan kadtong mga kabus maningkamot man gyud nga dunay masaw-an ang pamilya niining espesyal nga adlaw matag tuig.
Apan ang Department of Health mipasidaan sa tanan, ilabi na niadtong adunay mga balatian sama sa high blood pressure, diabetic, mga dunay sakit nga may kalambigitan sa cholesterol nga maghinayhinay lang sa pagkaon unya.
Kadtong dunay mga maintenance kinahanglang tumaron gyud kini sa dili pa magsugod ang kumbira sa balay o bisan sa mga silingan nga bisitahon.
Samot na para sa mga gibawalan na sa pag-inom og ilimnong makahubog, ibutang unta sa lugar ug sakto-sakto ang imnon kung dili gyud mabalibaran ang nitunol og baso.
Sa mga naglaraw nga magpabuto, mag-amping gyud sa tanang oras ilabi na sa mga bata ug sa mga nakainom na o hubog tungod kay sila maoy kasagarang mabiktima sa pabuto.
Labaw sa tanan, angay hinumdoman sa tanan nga ang Pasko dili para lang sa kumbira, inom, ug laag-laag dalang lingaw-lingaw.
Ang Pasko kinahanglang isipon nga panahon nga magkatapok ang matag pamilya sama sa Sagradong Pamilya ni Hesukristo, Mahal nga Birheng Maria ug Senyor San Jose.
Importante nga magmalipayon ug dili kagul-anan ang mosugat sa matag pamilya sa Pasko unyang tungang gabii pinaagi sa pagmatngon, pagrespetuhay, pagminahalay ug pagpaambit.
Gikan dinhi sa Banat News, Maayong Pasko kanatong tanan.