Husto ba nga isalig sa kagamhanan ngadto sa usa ka pribadong kompaniya ang pagkolekta sa parking fees sa mga sakyanan nga mo-park daplin sa karsada?
Wa kaha mabentahai ang kagamhanan sa Dakbayan sa Sugbo niining gisudlan nga kontrata sa siyudad, ug sa pribadong kompaniya nga maoy nangolekta sa parking fees gikan sa mga motorista? Kini maoy atong hisgotan karon kay bisan si Mayor Michael Rama nagduda nga nabentahaan gyud ang Cebu City government niining mao nga kontrata, ug mao nga gusto niya nga masusi pagbalik kining mao nga isyu. Nahukman kaniadto nga ang mga tag-iya’g sakyanan nga mo-park daplin sa mga karsada sa siyudad, pabayron aron nga ang mga driver ma-discourage sa pag-parking sa karsada. Kaniadtong mga dekada 80, dili pa kaayo daghan ang mga sakyanan dinhi sa Dakbayan sa Sugbo, ug sa mga silingan nga siyudad ug sa kalungsoran.
Apan sa pagpanglabay sa katuigan, mianam pagsaka ang gidaghanon sa mga sakyanan, kay daghang car dealers mitanyag man og barato nga installment plan sa ilang mga gibaligyang sakyanan.
Tungod niini, napuno na ang mga karsada sa mga sakyanan. Unya, bisan pa og dunay bayad ang pag-park sa mga sakyanan daplin sa karsada, gibaliwala ra kini sa mga motorista. Sa sinugdanan, tag P10 ra ang bayad kada oras niadtong mo-park sa mga sakyanan sa mga designated parking areas daplin sa karsada. Apan paglabay sa pila ka tuig, giusbawan ang parking fee ngadto sa P15 kada oras, ug dayon gihimo na nga P20.
Kaniadto, ang Cebu City Transportation Office nga gitawag pa og City Traffic Operations Management (CITOM), maoy nagdestino og mga parking aides nga mangolekta sa bayad gikan sa mga drivers ug sa tag-iya’g mga sakyanan nga mo-park sa karsada.
Diha’y mga tuig nga ang siyudad mikolekta og P38 milyones ug gani, may tuig gyud nga mikita ang CITOM og P52 milyones gikan lang sa parking fees.
Apan miabot ang higayon nga atol sa hinapos nga bahin sa termino ni kanhi mayor Tomas Osmena, nahukman sa mga opisyal sa Cebu City government nga ang pagdumala sa mga designated parking slots daplin sa karsada, ug ang pagpangolekta sa bayad, itugyan na sa private company.
Usa ka opisyal kaniadto miingon nga makabentaha kuno ang siyudad kon itugyan na lang sa private company ang pagdumala sa mga roadside parking areas, apil ang pagpangolekta sa bayad, kay ang City Hall igo ra kuno nga modawat og limpyo nga kita gikan sa iyang share.
Husto ba kaha ang pamahayag sa maong opisyal? Ipadayon nato ang paghisgot niining maong isyu dinhi sa Renbor Patrol, karong sunod semana ug atangi ang mga makapakurat nga detalyi.