Martin gipahinumdoman

Seguradong dili malimtan ni Presidente Bongbong Marcos ug ni House Speaker Martin Romualdez ang kaulahian nilang pagbisita sa Japan aron pagtambong sa ika-50th Commemorative ASEAN-Japan Friendship and Cooperation Summit.

Kay sa pag-abot pa lang nila sa venue, gisugat na sila sa mga Overseas Filipino Workers (OFW) og “WELCOME TO JAPAN” sagol indirektang panudya.

Dihang si Martin nay miagi sa ilang tungod, ang nag-Amerikanang lalaki, kinsa nagdalag banderita sa Pilipinas milamano dungan ang pag-ingon: “Welcome to Japan, Sir. Please support VP Inday Sara Duterte!” Nga mao poy nakasulat sa giplastar-inablihan niyang spring notebook.

Diin, mitando si Martin agig paundayon. Dayon may babayeng misumpay: “Thank you, po, Sir, sa pagsuporta kay VP Sara. At thank you, po, sa pag-api kay Ka Eric. Mali po yun!”

Pastilan, mora'g nabukog si Martin, uy! Pero napugos gihapog smile.

Kay dinha bayay kamera.

Ning padayong pag-abuso ni Martin sa iyang gahom isip hari sa Kongreso, diin hasta mga kongresista nahimo nang salawayon diha sa ilang gipakitang daotang taras sa pag-imbestigar panahon sa mga House hearing, kining tanan nakita, gisundan-gitutokan ug gibantayan sa nagpakabanang katilingban ug kinabag-ang puwersa sa kasundalohan, kinsa maoy tigpanalipod sa seguridad sa atong nasod ug katawhan.

Hinungdan, nga dihang gi-illegally detained sa mga Kongresista si Ka Eric Celiz ug Dra. Lorraine Badoy, mipirmag manifesto ang gatosan kapin ka retired PMAyers army general, nag-awhag sa Kongreso nga pabuhian sa madaling panahon ang nahisgotang duha ka SMNI host, kinsa pulos anti-CPP-NPA-NDF terrorists. Hasta mga PMA graduates mipirma sab og manifesto alang sa samang tumong.

Kini pagpahinumdom lang. Nga gikan sa sibilyan ngadto sa kasundalohan (retirado man o aktibo) wala na mahimuot sa garapalang gipanghimo ni Martin. Diin inay mahanaw ang korapsiyon, iya hinuong gipagrabe. Si Ka Eric, kinsa nangutana lang kon tinuod bang miabot og P1.8B ang travelling expenses ni Martin, gibilanggo hinuon?

Angay hinuktokan. Dihang gibilanggo si Ka Eric ug Dra. Lorraine, nagkahiusa ang PMA graduates ug retired PMAyer’s generals sa pagsuporta-rescue kanila. Diehard Duterte Supporters, vloggers, mga kanhi rebelde ug OFWs sa nagkalainlaing nasod nag-rally ug mipabati sab sa ilang simpatiya.

Samot na kon si VP Inday ug Tatay Digong maoy ipapriso ni Martin ug sa mga Kongresista.