Dili pa lang dugay dunay gidala ngari nako mga bata. Managsama ang ilang kahimtang. Biktima sila sa pang-abuso sa mga significant others diha sa pamilya. Ang duha gibuong sa ilang kaugalingong amahan.
Ang usa gibiktima sa iyang Lolo. Ang amahan nabilanggo na human mapasakai og kaso. Samtang kadtong lolo gipangita pa hangtud karon.
Ang maong kahimtang maoy hinungdan kun nganong ang mga bata dunay mga episodic nga diabolical attacks.
Ang usa pinaagi sa iyang damgo iyang makita ang mga itom nga tawo nga nigunit kaniya ug buot mohunos sa iyang kinabuhi.
Samtang ang usa dunay pangandoy nga unta magkahiusa ang iyang pamilya butang nga malisod na kaayo mahitabo sanglit duna namay kabilinggan ang iyang inahan.
Ang pamilya ingon nga basic unit sa Katilingban mao man ang giatake sa demonyo nga si Asmodeus.
Gumikan sa naghinobrang kahilig sa unod ang amahan nga giisip sa bata nga maoy seguridad ug kadaganan panahon sa dakong panginahanglan ang mao naman hinuon ang niunay kaniya.
Ang apohan nga maoy sumbanan unta sa makinaadmanong paggiya ug tambag mao naman hinuon ang unang nipakita sa iyang kaboang.
Kining maong panghitabo nakahatag og trauma sa mga hingtungdan. Malisod na kaayo alang kanila ang pag relate sa kasagrado sa kaminyoon gumikan sa mga hitabo nga niguba sa ilang ugma.
Dunay mga elemento nga buot manghilabot sa katungod sa mga ginikanan kun unsaon nila og pagdumala sa ilang mga anak tungod ug alang sa ngalan sa relihiyosong tema kalabot sa yawa ug impiyerno. Dunay mga relihiyosong pundok nga nag ilusyon nga sila dunay linaing gahom sa paghingillin sa mga dautang espiritu bisan pa man kun ang ilang pamaagi wala mahiuyon sa pagtulon-an ug kamandoan sa simbahan. Mora sila og kulto mo-brainwash ug human sa pag-brain wash nahimo silang maoy hinungdan sa dugang kagusbat sa ilang mga sakop.
Daghan kaayo kita og lihokon ug unta usa sa angayan natong iampo mao man ang atong pamilya. Balaang Banay ni Jesus Maria ug Jose, iampo mo kami!