Peace talks makaitok

Sa bag-o pang milingkod si Presidente Bongbong Marcos (PBBM) sa Malakanyang, padayon niyang gisuportahan ang war on drugs and corruption ug National Task Force to End Local Communist Armed Conflict (NTF-ELCAC) ni former Presdent Rodrigo Roa Duterte (FPRRD). Apan paglabay sa usa ka tuig kapin, nakigpinirmahay na si PBBM og peace talks sa mga lider sa CPP-NPA-NDF.

Gani, gusto pa niyang hataga’g amnesty ang mga nangaprisong walhon. Nga wala ikahimuot sa kinabag-ang hut-ong sa katilingban. Daghan kaayo ang gianugonan sa malampusong paagi sa NTF-ELCAC diha sa ilang pagpahinay sa puwersa sa CPP-NPA-NDF. Pildehonon na ang kontra. Unya, makig-peace talks na hinuon siya?

Maayo kay si Vice President Sara ‘Inday’ Duterte-Carpio miyugyog-pahinumdom ni PBBM: “Mr. President, the government statement with the NDF in Oslo was an agreement with the devil.

Napatunayan na natin sa kasaysayan na hindi sila seryoso at wala silang sinseridad sa kapayapaan. Gagamitin nila itong peace negotations sa pagtraydor ng pamahalaan at paglinglang sa taong bayan.”

Ang nakaparat, kay ang Kogreso mipabor sa desisyon ni PBBM. Labihang nakasaway sa ‘No peace talks-No amnesty nga pagpangablit ni Inday. May kongresistang nangugat-buyayaw, nga sila kunong elected public officials, lakip na si Inday, may gipanumpaan.  Nga sila magtinambayongay pagsilbe sa katawhan. Ug nganong tutol man si Inday sa gusto sa presidente?

Pastilan, kon base sa kasinatian ni Inday, pagahilantawan niyang kadautan lang sa atong nasud ang sangpotan ning maong peace talks-amnesty agreement, diin isip bise presidente sa Pilipinas, iyang obligasiyon ang pagprotehir sa seguridad natong tanan batok sa mga terorista, kinsa niining bag-o namomba na sab didto sa Mindanao State University, Marawi City ug mihunos og daghang kinabuhi sa mga inosenting estudyante, nganong barawon pa man sa Kongreso iyang pagpugong ni PBBM?

Kapila na ba mailad atong gobiyerno sa sigeng peace talks, diin miresulta og makanunayong kapakyasan? Dili ba gisirad-an na man kini panahon ni FPRRD? Ug mibungag maayo? Unya, nganong ablihan mag balik ni PBBM uban sa mga Kongresistang palingpaling, kinsa kaniadto, ‘No to peace talks?’ Unya karon, ‘Yes’ na?

Ambot, kon nasayod ba sila, nga ning ilang pagkamausab-usabon, ang katilingbang nagpakabana wala mahimuot? Ilang kasingkasing gikumot. Ug ilang ulo naitok. Kaya pa kaha nila?