EDITORYAL - Skywalks Osmeña Boulevard

Pila na ka bulan gihisgutan ang kabahin aning duha ka mga skywalks diha sa dalan Osmeña Blvd. nga maigo anang giugmad nga Cebu City Bus Rapid Transit project.

Kaniadto sa dihang bag-o pa kini ug maayong pagka-mentinar gamit kaayo sa mga pedestrians. Ilabi na ang skywalk diha sa atubangang bahin sa Cebu Normal University ug sa Abellana National School kay maagian gyud sa mga estudyante.

Mao sab ang skywalk gikan sa Department of Health Regional Office VII tabok sa Robinsons Department Store duol sa Fuente Osmeña Rotunda.

Apan sa kadugayan, murag wala naman maatiman kada adlaw, nahimo nang estambayanan og mga rugby boys ini og lawom ang kagabhion, gihimong katulganan sa mga libud-suroy ug anha pa usahay magbilin sa hugaw sa tawo.

Kinsa pa may ganahang mogamit aning maong mga estrakturaha nga pwerte namang hugawa unya dunay mga mag-estambay.

Karon nga naay BRT Project, mas maayo gyud nga tangtangon nalang kining maong mga skywalks kay wala naman gamita, aron mas mapadali ang paghuman sa maong giugmad nga proyekto.

Ang traffic nga namugna aning pagtrabaho mosamot kun madugay og human ang maong proyekto tungod lang aning maong mga skywalks.

Usa pa, napuslan naman sab sud sa taas-taas nga panahon ang maong mga estraktura. Maayong mausab na sab ang talan-awon sa maong lugar pinaagi aning BRT.