Pressure sa kapolisan

Laing sakop na sab sa kapolisan ang miula sa iyang dugo ug mihimo sa labing taas nga sakripisyo pagbuhis sa iyang kinabuhi tungod ug alang sa kampanya batok sa illegal nga drugas.

Si Corporal Ryan Baculi, sakop sa Regional Drug Enforcement Unit sa Police Regional Office-7, nagsilbing poseur buyer atol sa ilang gihimong buy-bust operation niadtong Nobyembre 16 sa sayong kadlawon didto sa Barangay Kinasang-an sa dakbayan sa Sugbo.

Dihang dakpon na unta nila ang mga suspetsadong durugista nga sila si Atong Rafols ug Ramil Salazar nasakpan siya nga usa diay ka polis hinungdan nga gipusil.

Gidali siya paghatud sa duol nga tambalanan apan nakabsan gyud sa kinabuhi tungod sa upat ka mga samad pinusilan.

Ang duha ka mga durogista nakasibat ug hangtud sa pagsuwat ko niining lindog nagpabilin pang gawasnon.

Upat na ka adlaw sukad sa hitabo apan wa pay balita ang kapolisan hain mosibat ang mga suspetsado.

Kinahanglang paspasan sa kapolisan ang ilang lihok ug ipakita sa publiko nga way dapit nga luwas alang sa mga kriminal--labi pa nga usa ka polis ang biktima.

Dako og epekto sa imahin sa kapolisan ang  matag-adlaw nga molabay nga di kahatagan og hustisya ang pamilya ni Baculi.

Kini tungod kay siguradong mag-anam sab og kahilis ang pagsalig sa publiko sa atong kapolisan.

Kinsa pa bay mosalig kun mismong sa ilang kaugalingon nga sakop di nila kahatagan sa dinalian nga hustisya?

Ug sigurado nga dako ni nga pressure alang sa liderato sa kapolisan dinhi sa rehiyon.

Si PRO-7 Anthony Aberin mimando na og manhunt operation ug duna na say mitanyag og P50,000 nga reward sa kasayuran nga makatabang pagsikop sa mga kriminal.

Hinaot makatabang ni aron mahimong mas sayon ug mas dali ang pagkab-ot sa hustisya!