Gihimug-atan sa kagamahan sa dakbayan sa Sugbo ang over-preparation sa posibleng epekto ugaling moigo ang bagyo kay sa ibalewala kini kay lagi midyo nihinay naman ug nahimo nalang nga low pressure area.
Matud ni acting mayor Raymond Alvin Garcia nga dili angayan kakompyansahan ang panahon karon busa tinod-on gyud ang pagpangandam.
Sugod kagahapong adlawa gilatag na tanan ang mga kahimanan nga magamit ugaling adunay katalagman nga moabot nga naglakip sa mga amublansiya, fire trucks nga magsilbeng rescue vehicles, heavy equipment ug ang mga rescue tools.
Syembre ang mga personnel gikan sa nagkadaiyang departamento sa city hall ug BFP nga maoy mangamot sa pagluwas sa kinabuhi ug kabtangan sa mga tawo nga maapektohan sa katalagman.
Sa nasinatian nato nga mga katalagman ilabi na sa bagyong Odette niadtong tuig 2021 ang nagtukmod sa LGU sa paghinubra sa ilang preparasyon aron dili na masoble pa ang nahitabong dako nga kakuwangan sa pagdumala sa mga apektado sa kalamidad.
Para nako mas maayo kini ang over-preparation principle batok sa bagyo sa kagamhanan sa Cebu City aron duna gyuy kasegurohan ug dili i-take for granted ang kinabuhi nga maapektohan.
Kong adunay katakos nga mag-over-prepared nganong dili man nato buhaton kay kutob nalang sa pagmahay nga unta adunay nahimo aron dili kaayo magrabehan sa epekto sa pwersa sa kinaiyahan.
Sa pagkakaron wala seguroy mosaway sa lakang sa kagamhanan sa Cebu City kay ang gilantaw niini ang pagluwas sa kinabuhi sa mga tawo simbako kong mahitabo gyud nga moigo ang bagyo. Kitang tanan man seguro nakasinati sa makalilisang nga
si Odette ug ang epekto niini nga hangtud karon nagbilin og trauma kanato.
Gutom, uhaw, walay suga ug uban pa nga kalbaryo ang namugna niadtong panahona.
Dunay kwarta unta apan dili maka withdraw kong adunay may ATM machine taas pud kaayo ang linya.
Kini ang dili gustong masinati nato pag usab kay hilabihan gyud ka miserable ang atong kinabuhi ug panghinabuhi niadtong tungora. Gani personal experience hangtud
karon mag over thinking pud ko unsay posibleng mahitabo busa mangandam lang pud kita.
Bahala og ingnon nga "over acting kon OA ra" basta gihimo lang nato ang tanan alang usab sa atong pamilya. Mangandam apan dili pud seguro pasobrahan nga mag panic buying na hinoon. Labaw sa tanan ang atong pagahimoon ang hugot nga pag ampo nga unta matunaw ang dautang panahon.