Mangtas sa pagpangawkaw

Gipaambit ni Presidente Marcos ang kabahin sa mga multo ug ubang kahibulongan’g panghitabo nga iyang nasinati sa iyang pagpuyo sa Malacanang. Nalangkob niini ang kalit nga paglihok sa mga lingkoranan ug mga chandelier ingon man ang pag-abli ug pagsira sa mga bintana ug pultahan sa ilang kaugalingon.  Makapahinumdum kini sa gibutyag sa kanhi konsehal sa dakbayan sa Sugbo nga adunay ungo usab sa Cebu City hall. Apan ang nakalahi kay ang maong ungo sa Cebu City Hall dili makalilisang nga nilalang sa kangitngit kon dili mangtas kuno sa pagpangawkaw sa pundo sa gobyerno.  Hala nooo!

Tigulang nga hanggaw

Adunay tulo ka mananaug nga kandidato sa BSK Elections sa Central Visayas ang dili una maproklamar hangtud nga dili pa maresolbar ang kasong diskwalipikasyon batok kanila.  Tataw nga ang hinungdan sa maong kahimtang mao ang lagda sa COMELEC nga nagtugot nga makalansad bisan kadtong aduna’y mga pending nga kaso sa korte.  Nagbalik-balik na gani ang maong kataw-anan nga kahimtang apan padayon gihapon’g gisagop sa COMELEC ang maong lagda.  Tinuod gyud diay ang panultihon nga, “Ang hanggaw dili mahimong maalamon bisan kon motaas na ang iyang pangedaron; hinonoa, mahimo lang siya’ng tigulang nga hanggaw”. Fezteleern!

Walay buotan nga politiko

Gipahalipayan ni Presidente Marcos ang mga bag-ong napili nga mga barangay ug youth council officials dungan ang pagpahinumdum kanila nga magmatinud-anon kanunay sa ilang katungdanan ug nga ipatigbabaw kanunay ang kaayohan sa katawhan.  Baniog nga sa miaging eleksyon, daghang kandidato ang midangop sa vote-buying aron makadaug.  Busa maingon nato nga daghang mananaug ang kwestiyonable na ang pagkamatinud-anon.  Mahulog lang sa mga bungol nga dalunggan ang panawagan sa Presidente.  Kay ginaingon man nga, “Walay buotan nga politiko sama nga wala usa’y matinud-anon nga kawatan”.  Madahaan!

Wala pa ma-impas

Sumala sa datos sa Association of Southeast Asian Nations Automotive Federation (AAF), padayon ang Pilipinas nga mitala sa labing paspas nga motor vehicle production ug sa labing taas nga growth rate sa halin sa sakyanan sa tibuok ASEAN region karong tuiga.  Usa sa labing dakong hinungdan sa trapik sa mga dagkong syudad sa Pilipinas mao ang pagpunay’g buhat ug pagpamaligya sa mga bag-ong sakyanan.  Idugang pa nini ang kasayon pagpanag-iya og sakyanan pinaagi sa pautang.  Sugyot sa akong amigo, “Aron mamenosan ang trapik, mas maayo tingale nga dili lang una padaganon kadtong mga sakyanan nga wala pa maimpas ang datahan”.  Pagkatoytoy!

Bug-at ang pagbasol

Samtang namalandong ang mga Cebuano sa Adlaw sa mga Santos ug Adlaw sa mga Kalag, nakasinati usab og kusog nga halin ang mga baligya’ng kandila ug bulak sa Carbon Public Market sa Cebu City.  Nabatyagan nga mimahal usab ang maong mga baligya.  Ang pagsaulog sa kalag-kalag usa ka relihiyosong kultura sa mga katolikong Pilipino. Ni’ng maong kultura ug batasan sa paghatag ug bulak sa mga mitaliwan, haum ang panultihon nga, “Mas daghang bulak ang madawat sa mga patay kay sa mga buhi pa, tungod kay mas bug-at nga pagbati ang pagbasol kay sa pagpasaylo”.  Muleeng!