Natapos na ang Barangay ug Sangguniang Kabataan Elections kagahapon, Oktobre 30,2023. Duna gyuy mga nangaparot ug napulihan, dunay nasublian sa posisyon samtang dunay mga bag-ong gihatagan og mandato sa mga molupyo sa ilang tagsa-tagsa ka barangay.
Sama sa naandang nangaging mga eleksyon, naa gyuy mga nangaparot nga dili makadawat nga sila napildi. Sagad nila motiyabaw gyud nga sila gitikasan. Ang uban moabot pa gyud sa korte sa tinguhang ma-overturn ang resulta. Dinhi sa Pilipinas man gud, way pildero, gitikasan ra.
Maayo lang tingali na ang protesta-protesta kun ang deperensiya may labot sa bot okay madala ra man kana og recount. Unya kung ang ligas gamay ra pwede ra kaayo.
Apan kaning uban moprotesta tungod kay nagduda silang namalit og boto, illegal campaigning, ug uban pa, murag dili na kaayo katuohan ug puol paminawon.
Sagad ani, butangbutang nalang kay sila mismo naghimo sab aning mga ilegal nga pamaagi apan nalabwan lang sa ilang mga kaatbang.
Gani makita gyud bisan diha sa mga eskuylahan nga gihimong polling centers nga daghan kaayong mga kandidato ang wala gani motuman bisan sa basic na kaayo nga patakarang gipasunod sa Comelec, ang sizes palang sa ilang campaign posters nanglapas na sa gidak-on sa 2x3 feet sizes.
Anha palang makita gyud nga daghang mga nanagan karon nga mga bentahoso. Kanang pamintaha nga klaro kaayong para gyud sa kaugalingong interes aron makalabaw sa ilang kaatbang.
Sa mga napili karon, nasublian man o bag-o, wala lang unta ni sila nakadaog tungod sa pagpalit nila sa mga boto.
Tungod kay sigurado nga kun mao kini ang ilang gihimo, walay mapaabot nga maayong binuhatan ang mga tawo sa ilang paglingkod.
Kung mahimo, dili nalang unta magprotesta ang mga pildero ug suportahan nalang kun kinsa ang nakadaog aron makasugod dayon sa panerbisyo kining mga gihatagan og mandato sa katawhan.
Sa pikas bahin, maayo unta og tinud-on sa Comelec nga kadtong mga kandidatong nakadaog kun dunay nakaung-ong nga kaso ug kadtong dunay mga election violations, dili gyud iproklamar ug dili palingkuron.