Kalabot sa mga dautang espiritu, nagkondenar nga mga kalagkalag sa Porgatoryo

Fr. Winston Cabading, OP

Basaha ang Mk. 5;-20

1. Ang mga dautang espiritu mahugaw ug dautan ug dili mahitabo nga gikan sila sa Dios. Tumong nila ang paghasi kanatong mga tawo ug pagpahilayo nato gikan sa Dios. Atong hinumdoman kining mosunod:

a. Ang mga dautang espiritu ganahan modawat og mga halad gikan sa mga tawo sama sa mga pagkaon, dugo sa hayop, abot sa uma isip halad sa pakigdait. Kay kondili mohimo ang tawo ning maong halad, mamahimong suklian kini og sakit ug bisan unsang kadaut. Hinumdomi kini bugtong Dios lamang ang angayang simbahon ug dili ang mga engkanto. Ning paagiha nakasala kita sa unang sugo. Ug nga atong gitugotan nato ang atong kaugalingon nga makonsagrar ngadto sa mga demonyo nga tungod niining maong balansayon sama sa padugo ug diwatahan ato silang gihatagan og katungod nga mokupot sa atong kinabuhi.

b. Malinglahon ang mga dautang mga espiritu. Ning maong paglingla mahimo silang mogawas ingon nga mga anghel sa kahayag, si Mama Mary, Santos, o bisan gani mga anghel gikan sa Langit. Atong masakpan ang ilang bunga pinaagi sa ilang mga mensahe. Kasagaran niini naghisgot man kalabot sa mga butang nga puno sa garbo ug mga butang kawang lamang.

c. Ang bisan unsang panan-awon nga nagasukad sa occult third eye ang pagasabton gayud nga gikan sa mga demonyo. Ang tanang engkanto ug mga Diwata ang pagsabton gyud nga mga demonyo.

d. Ang mga dautang mga Espiritu mosaad og gahum, bahandi ug katagbawan. Ang mga gahum nga mahimong mahuptan sama sa pag-ayo sa mga balatian maayo man sa sinugdanan apan mamahimong dautan kun ang mananambal mismo nga nag-ayo dunay gahum usab sa pagdaut sama sa mga itom nga mahika (barang, usik, etc.) ang angayang dudahan. Kini tungod kay ang mga pamaagi nga sama niini iya gyud sa demonyo.

e. Dili dayon mahibaloan ang mga dautang Espiritu nga anaa diha sa tawo. Mahimong ang tawo pagaisipon nga buotan, ug santoson. Apan kun ang maong tawo magdumili sa pagpaminaw sa pagtulon-an sa simbahan ug nahimong magahi sa pagsunod sa mga kamandoan ug sa Balaang Kasulatan, makaingon kita nga dunay demonyo nga nagtago ning maong tawo.

f. Kun nagbansay sila sa mga pamaagi sa New Age pagaisipon gihapon kining iya sa occult.

g. Ang mga dautang Espiritu kanunay nga magdala sa mga hingtungdan ngadto sa pagpakasala ug dili sa kinabuhi sa birtud ug kabalaan.

h. Ang dautang Espiritu kanunay nga modasig sa iyang mga biktima nga magpuyo diha sa garbo ug kakawangan.

i. Ang mga dautang mga espirtu buot gyud mosulod sa lawas o moangkon niini uban ang pasalig nga ilang dad-on o kuyogon ang mga biktima sa mga dapit o mga gingharian nga engkantohanon.

j. Ang mga dautang espiritu murag mga kulto ilang ilayo gikan sa mga tawo nga nagmahal sa biktima o sa simbahan aron mapugngan kini nga makakat-on sa pagtulon-an nga iya sa Dios.

k. Ang mga dautang espiritu kanunay nga maglaag lag sa bisan asang mga dapit mangita og mga biktima.

l. Ang mga dautang mga espiritu dunay kasuko sa bisan unsang mga Sagrado butang man o mga tawo.

m. Ang mga dautang mga espiritu walay pagtahud sa lawas sa tawo o sa dapit. Sa tanang panahon tinguha lamang nila ang pagpahimulos ug pagdagmal sa tawo.

Ang mga Kalag nga kondenado?

1. Ang mga kalag nga na impiyerno dili na mahimong makalingkawas gikan sa maong silot. Gihukman na sila sa ilang kamatayon pa lang daan. Ang tanang mga kalag “kuno” nga gisangpit pinaagi sa mga “occult” nga mga duwa sama sa spirit of the glass, oujia boards, mediumship nga moresulta sa demonic possession ang gikan gyud sa demonyo.

2. Unsaon man nato pag-ila ang mga kalag nga gikan sa atong mga mahal nga nangamatay gikan sa mga demonyo?

a. Dili kahadlokan ang iyang pagpakita. Walay igong langay ibungat niini ang iyang tuyo nga mao ang mga pag-ampo. Ang spiritual cause of haunting sa usa ka dapit gumikan sa kalag maoy sanglitanan niini. Ang tanang mga paranormal nga mga kalihukan mahanaw kun ang misa ug mga pag-ampo mahalad alang sa namatay.

b. Dili mahadlok ang kalag nga gikan sa purgatoryo sa atong mga pag-ampo. Ang pag-ampo sa Amahan Namo, Maghimaya ka Maria, Himaya sa Amahan ug ang Pahulay nga dayon makahatag man og hinanaling epekto. Kun positibo ang resulta nan, paila kini nga balaanon ang Espiritu apan kun negatibo sama pananglit sa kasuko, timailhan kini nga dautan kining maong Espiritu. Padayon ang pag-ampo ug ning tungora ampoon ang Salve Regina ug ang Santos nga Rosaryo. Likayi ang pakighinabi ning maong Espiritu bisan pa man kun kini nangangkon nga gikan siya sa purgatoryo.

c. Dili mahadlok ang maayong mga espiritu o mga ang kalag sa purgatoryo sa mga butang nga Sagrado. Dili sila mahadlok sa mga sakamental nga butang sama sa exorcised salt, exorcised water, mga krusipiho, medalyon ni San Benito ug uban pa. Kun ugaling ang maong Espiritu mohangyo nga kuhaon gikan sa nahimutangan niini o sa lawas sa hingtungdan ang mga sacramental nga butang nga atong gihisgutan sa unahan, nagpasabot kini nga demonyo ang imong gikaatubang.

d. Ang balaang kalag sa purgatoryo wala na magkinahanglan og lawas nga kasudlan aron kuno makapadayag sa iyang mensahe.

Kun mao kini ang hangyo sa nahisgotang espiritu nagpaila lamang kini nga siya demonyo.

e. Ang mga espiritu nga makit-an ug masinati sa mga nagkadaiyang mga dapit sama sa mga balay, dalan, kalasangan, bukid, ug uban pa ang pagaisipon nga mga dautang mga espiritu ug dili kalag.

3. Atong hinumdoman nga ang mga balaang mga espiritu ug ang mga santos kanunay nga mosangyaw sa kalinaw nga bugtong Dios lamang ang makahatag.

Ang paghinulsol sa mga sala, ang pagkamasinugtanon sa pagtulon-an sa Santa Iglesya ug sa mga kadagkoan niini gikan sa Santo Papa hangtud na sa mga kaparian. Ug kun ugaling nahimong dakong supak ang pagtulon-an nga gikan sa mga mensahe nga nadawat sa usa ka visionary gikan sa kalag o usa ka santos o sa anghel sa pagtulon-an ug doktrina sa simbahan, nan, angayan lamang nga kita magduda.

Gyud niini labina kun mabutang sa kakuyaw ang atong kaluwasan.