Aron pagsulbad sa problema sa trapiko sa habagatang bahin sa dakbayan sa Sugbo labi pa sa Natalio Bacalso Avenue, tinguha ni Mayor Michael Rama nga di na tugotan ang mga minibus nga molahos sa South Bus Terminal.
Gipahibawo sa mayor ang iyang plano atol sa convergence meeting nga iyang gipatawag uban sa mga representante sa mga local government units sa first district sa lalawigan sa Sugbo---Talisay, Minglanilla, Naga, San Fernando, Carcar, ug Sibonga.
Matud sa mayor di na niya tugotan ang mga minibus nga moagi sa Bulacao paingon sa south bus terminal. Ang mga minibus adto na mopasakay ug mopakanaog sa ilang mga pasahero sa South Road Properties.
Paagi ni aron maminusan ang kahuot sa N. Bacalso nunot sa nagpadayon nga construction sa BRT project.
Ang tinuod long overdue na ning maong plano. Apan di lang minibus maoy angayang ibalhin sa SRP kun dili ang operasyon sa tibuok South Bus Terminal.
Ug aron mahimo nga way kakulian ang maong plano angayang makig-alayon si Rama sa kagamhanan sa lalawigan nga maoy nanag-iya sa terminal.
Angayang ilambigit ni Rama ang probinsiya sa Sugbo sa bisan unsang plano niini nga maapektuhan ang interest sa probinsiya aron malikayan ang posibling panagbingkil.
Sa akong nabantayan way representante sa lalawigan sa Sugbo atol sa convergence meeting nga unta apektado man ang lalawigan sa ilang plano.
Kun did-an ang mga minibus nga makalapos sa terminal siguradong mominus ang kita sa terminal.
Ang angayang buhaton aron molampos ang maong plano mao nga magsabot pagbalik ang kagamhanan sa dakbayan ug lalawigan alang sa posibling pagpadayon sa land swapping aron ibalhin ang terminal sa SRP.
Sa ingon niini malikayan ang posibilidad sa panagbingkil ug masulbad ang problema sa trapiko diha sa N. Bacalso.