Ang mga Sakramental: Ang Agua Bendita

Sukaranang Teksto

“Ug magkuha ang pari og balaang tubig nga isulod niya sa sudlanan nga hinimo'g yuta ug butangan niya kini og abog nga kinuha gikan sa salog sa Tolda.” (Num. 5;17)

Pasiuna Ampoa kini

Umanhi ka O Espiritu Santo pun-a sa kalayo sa imong gugma

Ang mga kasingkasing sa imong mga alagad, ipadala ang imong Espiritu ug mamugna sila ug bag-ohon mo ang dagway sa yuta

Pagpalawom

Ang kahulogan sa Agua Bendita.

Literal kini nga nagpasabot og Balaang Tubig kun Tubig nga Gibendisyonan. Kini ang gamiton natong mga Katoliko labina sa mga pagbalaan sa mga kagamitang sacramental, pagbendisyon sa mga panimalay, kagamitan, ingon man sa mga tawo. Naanad kita nga kaniadto nga sa dili pa kita mosulod sa simbahan atong itunlob ang atong tudlo sa sudlanan sa bendita aron ikuros sa atong kaugalingon.

II. Ang Agua Bendita nipahinumdom kanato ning mosunod:

a. Ang tubig sa dagat nga pula nga natunga aron agian sa mga Israelita padulong sa yutang gisaad.

b. Nipahinudom kini kanato sa atong tagsatagsa ka bunyag nga nihugas kanato gikan sa mga salang panulondon ug naglimpiyo kanato gikan sa tanang kahugawan. Si Propeta Ezekiel nagkanayon: “Ang Ginoong Dios namulong niini: Bubo-an ko kamo og tin-aw nga tubig aron mahugasan ug mahinlo kamo gikan sa kahugaw!” (cf. Ez. 36;25).

c. Sa atong pagbendisyon sa atong kaugalingon ginamit  ang agua bendita atong ampoon kining mosunod: “Ginoo hugasi ako pag-ayo sa akong kalapasan ug hinloi ako sa tanang kadautan!” (cf. Sal. 51;4)

d. Sa laing bahin ang agua bendita dili lang sacramental ug kahimanan sa pagbendisyon sa bisan unsa ug ni bisan kinsa hinunoa hinagiban usab kini batok sa gahum sa kangitngit.

Adunay linain nga bendisyon sa tubig aron mamahimo kining usa ka exorcized water. Ang exorcized water mao man kadtong gamiton sa mga eksorsista ug bisan gani sa matag pamilya nga hinagiban ug panalipod aron abugon ang bisan unsang panuway ug yawa nga maghasol kanato ug sa atong kabtangan.

e. Ato usab gamiton ang agua bendita sa mga lubnganan sa atong mga mahal sa kinabuhi timaan sa dakong kahiusa. Kini matud pa ni San Pablo ngadto sa iyang sulat ngadto sa Taga Roma: “Iya kita sa Ginoo sa kinabuhi ug sa Kamatayon!” (cf. Rom. 14;8)

Pangamuyo

Ampoa ang Kredo sa mga Apostoles

Kalihukan Karong Adlawa

1.    Isip ginikanan, himoang Batasan ang pagsablig og agua bendita sa inyong mga lawak ug sa mga anak Ninyo sa dili pa sila matulog. Panalipod kini batok sa gahum sa kangitngit ug ang pagbalaan sa inyong pagkatulog.