Adios, Sir Choy!

Buotan, mahigalaon, ug loyal nga amigo maoy akong pagkaila sa beteranong broadcaster nga si Choy Torralba.

Di na ko kahinumdom sa unang adlaw sa among paghimamat apan di gyud nako malimtan nga sa matag higayon nga kami magkita mosampit dayon siya nako og "Sir Fred."

Mauwaw ug maikog kaayo ko nga bisan sa iyang ka beterano ug ka inila sa industriya mosampit siya nako niini.

Ingon siya niini ka mapaubsanon bisan sa iyang estado. Sulod sa pila ka tuig nga kami nagkauban niadto sa dyLA ako sab nga nasaksihan ang iyang kinaiya isip loyal nga higala.

Dihang miulbo ang problema sa pamuo sa usa ka iladong department store sa dakbayan nga gipanag-iya sa iyang higala, si Sir Choy wala magpanuko pagdapig sa iyang higala bisan pa og bugti niini ang iyang programa sa dyLA nga gipanag-iya sa labor union nga nalambigit sa protesta batok sa dakong tindahan.

Tungod sa paglaban ni  Sir Choy sa iyang amigo nahunong ang iyang pagsibya sa dyLA apan wala magdugay nibalhin siya sa dyRF nga maoy katapusang sibyaanan nga nadungog ang iyang programa--Tug-ani ang Lungsod.

Bisan didto na siya mag-alagad sa laing sibyaanan, dunay mga higayon nga mokalit siya sa pagpanawag sa telepono aron mangumusta, labi na kun masayod siya nga duna kay problema.

Bag-o man o beterano sa industriya wa siyay gipili--ang tanan iyang amigo.

Atol sa pandemic dihang na dengue ang iyang anak mitawag si Sir Choy nako og nagpatabang asa mangita og mangagaw. Nangibot ko og mangagaw sa daruhan sa bukid ug akong gihatod sa iyang pinuy-anan sanglit di siyang kagawas tungod sa mga health protocol nga gipatuman niadto sa gobiyerno.

Isip iyang pasalamat mikuha siya og usa ka karton sa ilimnon nga dunay dagwag sa usa ka senador. Sobra diay kuno to sa ilang gipanghatag sa kampanya sa lain niyang higala nga gisuportahan.

Di siyang pabalibad busa naglibog ko unsaon ang binotelya nga di man ko palahubog. Salamat nga dunay mga estambay nga andam og tagana--nasulbad ang akong problema. Lol

Sa iyang pagtaliwan, nagbilin si Sir Choy og kahaw-ang sa akong dughan ug sa tibuok industriya sa media dinhi sa Sugbo.

Ang iyang mga hunahuna ug opinyon sa kahanginan dako og natampo pag-umol sa mga hunahuna sa publiko aron sila magiyahan paghimo sa mga importanteng desisyon.

Pahulay sa dayon, Sir Choy! Hangtud sa sunod higayon natong panagkita!