Pamolitika sa kulto
Kon si Gobernador Lyndon Barbers ang tuohan, unang nahibaw-an ang mga abuso sa kulto sa Sityo Kapihan sa Barangay Sering sa Munisipyo sa Socorro sa Mayo ning tuiga. Dihang babaye nga kawani sa Kapitolyo nagpatabang kay ang iyang bana giminyo na sa kulto sa lain.
Ang babayeng kawani wa pasudla sa compound sa Socorro Bayanihan Service Inc. (SBSI) sa Kapihan. Igo lang giingnan nga di na mobalik ang iyang bana sa ilang pinuy-anan. Matud ni Barbers ang insidente nakaaghat niya pagtukod og task force aron pagsusi sa kalihokan sa kulto.
* * *
Pero kon ang gipulihan ni Barbers sa puwesto maoy paminawon, unang gipa-imbestigar ang mga pasangil sa pangabuso sa kulto niadto pang 2019. Matud ni kanhi Gobernador Francisco Matugas iyang gipa-imbestigar ang military training sa mga sakop sa kulto.
Gipasusi sab ni Matugas sa task force nga gisakpan sa nagkalainlaing ahensiya sa gobyerno ang kalit nga resignasyon sa mga magtutudlo, mga polis ug ubang kawani sa gobyerno ug paghunong sa pag-eskuyla sa mga bata. Napulihan na lang ni Barbers sa Kapitolyo, wa pa makapahibawo si Matugas sa resulta sa imbestigasyon.
* * *
Mas mabungahon ang imbestigasyon ni Barbers: Gipasakaan sa National Bureau of Investigation (NBI) og mga kasong kriminal ang kadagkoan sa SBSI; ug nabisto ang kalihokan sa kulto sa privilege speech ni Senador Risa Hontiveros ug sa nisunod nga imbestigasyon sa Senado.
Posibleng katin-awan sa pagtak-om ni Matugas ug sa ka-agresibo ni Barbers: Ang deklarasyon ni Jay Rence Quilario, alyas Senior Agila, ang pangu sa SBSI, nga ang ilang grupo hingpit nga nagsuporta sa mga Matugas.
* * *
Mabantang ang politikanhong aspeto sa kontrobersiya kon madayon ang buwag nga imbestigasyon sa House of Representatives sa mga pangabuso sa kulto. Kay ang duha ka kongresista sa Surigao del Norte, silang Bingo Matugas sa unang distrito ug Ace Barbers sa ikaduhang distrito, gipaabot nga di mangiyugpos ug magpakahilom.
Ang duha ka politikanhong dinastiya nga nidominar sa Surigao del Norte pulos mga alyado sa mga Duterte pero sa managlahi nga partido: Ang mga Barbers sakop sa Hugpong ng Pagbabago ni Bise Presidente Sara Duterte Carpio; samtang ang mga Matugas sakop sa PDP-Laban Cusi Wing ni kanhi Presidente Rodrigo Duterte.
* * *
- Latest
