Salamat sa kahigayonan

Maayong Balita

Dinhi sa ebanghelyo atong nakita ang agalon nga nagpangita og mga trabahador alang sa iyang parasan. Atong nakita nga gikan sa buntag hangtud gani sa hapon, padayon siyang nangita.

Ug sa dihang niabot ang tukmang takna gipanghatagan sila og managsamang suhol. Dunay ni-protesta, sila kadtong mga tawo nga nag-una og trabaho sa buntag nga napagba sa kainit.

Apan gipakita sila sa agalon, nga siya ang dunay dakong katungod kun unsaon paggamit ang maong salapi. Manggihatagon siya ug dili kini angay nga kasinahan.

Kasinatian

Ang pito ka mga sakramento nagpahinumdom lamang kanato nga gikan sa atong pagkahimugso hangtud na sa atong kamatayon, anaa ang dios kanato nagauban.

Sa makadaghang higayon kita nahimong masalaypon ug nahisalaag apan sa makadaghang higayon usab kita gihatagan og kahigayonan nga mapasaylo. Kini tungod kay dili buot sa dios nga mamatay ang usa ka tawong makasasala.

Mao nga bisan diha sa akto sa kamatayon anaa ang dios naghatag kanato sa kahigayonan nga mobalik ngadto kaniya.

Apan anugon lang daghan man pud nato ang wala maghatag niini og igong gibug-aton. Kini tungod kay nagtuo man kita nga anaa gihapon ang panahon.

Ang pagtuo nga anaa kanato pabor ang tanang panahon, usa man ka dakong lit-ag nga gihimo sa yawa. Busa angayan lamang nga atong isipon ang matag adlaw nga atong katapusan, ug busa kahigayonan sa pagbag-o.

Lihok

Karong semanaha atong pasalamatan ang Ginoo sa mga kahigayonan nga iyang gihatag kanato. Ikaduha, managlahi ang atong panaw sa pagbag-o ug busa dili makiangayon ang atong itandi ang atong kaugalingon ngadto sa uban.

Ikatulo, mahinungdanon kaayo ang pagkamatinud-anon diha sa atong paghinulsol. Kompisal sa imong mga sala.

Pangamuyo

Huyang ako ug makasasala busa nangayo ko sa imong kalooy Ginoo. Pasayloa intawon ako ug unta tugotan mong makauban ka hangtud sa hangtud. Salamat sa kahigayonan nga ako mausab.

Ikaw nga buhi og hari hangtud sa kahangturan. Amen