Ligoy ug absenero
Sakto ang mga mag-uuma: Ang perfect attendance ni Presidente Ferdinand Marcos Jr. sa Formula 1 Singapore Grand Prix ug ang iyang zero attendance sa mga tigom sa Department of Agriculture (DA) maoy timaan asa ang tinuod niyang gugma.
Sakto sab ang mga aktibista: Dakong eskandalo ang pagpalabi ni Marcos Jr. sa pakig-uban sa bantogan ug multi-milyonaryo nga F1 drivers sa Singapore kay sa pagpangita og mga paagi sa pagpagaan sa palas-unon sa mga motorista sa Pilipinas nga nahiagom sa ika-11 nang sunudsunod nga semana sa pagsulbong sa presyo sa lana.
* * *
Wa mag-imbento og istorya ang mga mag-uuma sa attendance record ni Marcos:
· Niangkon ang Malakanyang nga way absent si Marcos sa duha ka F1 sa Singapore sukad siya nakalingkod sa Malakanyang, nitambong uban sa iyang anak nga si Kongresista Sandro Marcos sa Oktubre sa niaging tuig ug gikuyogan sa iyang ig-agaw nga si House Speaker Martin Romualdez sa niaging weekend; ug
· Nikumpisal si DA Senior Undersecretary Domingo Panganiban nga wa pakita si Marcos bisan kausa sa ilang mga tigom sa DA sa niaging unom na ka buwan.
* * *
Di sab peke ang kasayuran sa mga aktibista:
· Ambot pila ka milyon ka pesos sa buhis sa katawhan ang naggasto sa dul-an semanang bakasyon sa Singapore uban sa dako niyang delegasyon, nga gitapos sa iyang pagsud sa Ferrari garage, nga gireserba para ra sa team members ug principal sponsors; ug
· Ang krudo ni-uminto og P2.50 ug kerosene P2 kada litro sa ika-11 nga sunudsunod nga semana ug gasolina ni-uminto og P2 kada litro sa ika-10 nga sunudsunod nga semana.
* * *
Sa di pa mangugat si Marcos nga mas daghang langyaw’ng negosyante ang nakumbinser pagbubo sa ilang puhonan sa atong nasud tungod sa 16 niya ka biyahe sa ubang kanasuran, nga nakapaburot sa iyang travel expenses og kapin sa 1,000%, angayng ipasabot ang makapasubo nga balita gikan sa Bangko Sentral ng Pilipinas:
Nitibugsok og $1 ka bilyon (P56.8 bilyones) ang nisud nga langyawng puhonan sa Enero hangtod Hunyo karong tuiga: $3.91 bilyones (P222.2 bilyones) ra; gikan sa $4.91 bilyones (P279.1 bilyones) sa samang higayon sa niaging tuig.
* * *
- Latest
