"Sala ninyo"

Nasud-ipan ko's kape human madungog ang tubag ni Mayor Teresa Alegado sa Consolacion sa reklamo sa mga motorista nga natanggong sa grabing kahuot sa trapiko diha sa iyang lungsod.

Inay mangayo og dispensa sa kahasol nga nasinati sa mga motorista nga miagi sa iyang lungsod sa miaging semana ug pasaligang gihimo sa iyang administrasyon ang tanang paagi pagsulbad sa problema, gibasol na hinuon niya ang mga molupyo sa iyang lungsod ug mga silingang dapit niini nganong didto sila namuyo.

Matud ni Alegado nga sala sa mga mipuyo didto sa amihanang mga lungsod nganong wa sila mopalit og pinuy-anan dinhi sa dakbayan sa Sugbo ug Mandaue. Iya pang gipakapinan sa pag-ingon nga "daghan man kaha sila og kwarta."

Nakasabot ko sa gibati ni Alegado kay di lalim ang mahimong sentro sa mga pagsaway. Apan angayan sab niyang hinumduman nga siya usa ka public official.

Way luna alang sa mga arogante ang serbisyo publiko. Kun di siya gustong mahiagom sa mga pagsaway, duha ka butang ang iyang pilian.

Una, magpabilin siya sa pribadong kinabuhi ug di magpatugatuga og papili og public office.

Ug ikaduha, iyang tarungon ang iyang trabaho. Di ko motuo nga di mohapsay ang trapiko diha sa Consolacion kun kamao mangita og paagi ang mga opisyal sa lungsod.

Namatud-an ni sa lungsod sa Minglanilla ubos sa batan-ong Mayor nga si Rajiv Enad. Kaniadto gibansagan na nga traffic capital ang Minglanilla diha sa habagatan. Apan nganong napahapsay man nila karon ang dagan sa trapiko?

Kun dunay plano ug disidido nga ipatuman bisan kinsay maapektohan masulbad o di man gani maminusan ang problema. Pero husto si Alegado nga sala sa mga tawo labi pa gyud sa mga taga-Consolacion-- ilang sala nga mipili niya isip ilang mayor.