Naghinuktok ko nga naluoy samtang nagtutok sa mga kawani sa Cebu City government nga miubog sa hugaw kaayong tubig sa gamay’ng sapa diha sa Sikatuna ug Bonifacio Street.
Gilimpyohan nila ang sapa nga maguwang na lang og gamay sa kanal, gumikan sa kahakog og pwesto sa mga tawo nga namuyo daplin nianang sapaa nga gikan sa Barangay Day-as.
Tagsa ra ang dunay kaisog sa pag-ubog nianang hugaw kaayong yanang ug tubig sa sapa. Sus, kagilok nga hunahunaon, ug ang uban nagkatawa pa, pero ako nakahinuktok.
Base sa karaang mapa sa kasapaan nato dinhi sa Cebu City kaniadto, lapad pa ang maong sapa apan tungod sa way pagpakabana sa mga opisyal sa kagamhanan, apil ang barangay, mao nga migamay na ang maong sapa.
Aw, tan-awa, kana lang building nga ang tag-iya nagnegosyo og mga puthaw, daplin gyud na sa karsada ug makita gyud unta nga mikawat na sila og pwesto sa sapa, nabadlong ba gud nila?
Makita man nimo nga ang karaang semento nga gihimong barandilya sa tulay diha sa Sikatuna Street, dunay gikulit nga “1920” ug masabot gyud kon unsa ang gidak-on sa sapa kaniadto.
Gili-li nako ang ilawom sa karsada nga anaa mag-agi ang sapa, sus, wa na gyuy hapit kaagian sa tubig tungod sa daghang mga kahoy ug mga sagbot nga nakaali.
Panahon nga maglunop ang eskina Sikatuna ug Bonifacio Street, kining mga tawo nga hakog kaayo’g mga pwesto nga maoy nakapagamay sa sapa, dili sila masakripisyo kay naa man sila sa ibabaw nga bahin.
Ang masakripiso tawon mao ang namuyo sa ubos dapit sa eskina Bonifacio kay kanunay nga malunopan ang ilang kabalayan sa tubig.
Angay’ng hingusgan gyud sa kagamhanan sa siyudad sa Sugbo ang pagpangguba sa mga estraktura nga nakapagamay sa kasapaan, kon gusto ta nga masulbad ang problema sa baha.
Unya, hangyoon nako ang mga opisyal sa siyudad sa Sugbo nga paninguhaa tawon nga dili malangan ang pagsweldo niining mga Job Order workers nga gigamit nato sa pagpanglimpyo sa kasapaan.
Pait tawon kaayo ang kinabuhi niining mga tawhana kay panahon sa Sabado ug Domingo nga wa silay trabaho, wa sab silay sweldo. Dili sama sa mga kaswal nga sigeng sweldo bisan og Sabado’g Domingo.
* * *
Nalipay ko kay dunay kamandoan si Atty. Jerone Castillo, ang usa sa mga gisaligan ni Mayor Michael Rama, diha sa Task Force Gubat sa Baha, nga patambongon na ko sa ilang mga miting.
Pinaagi niini, makatampo na ko sa paghatag og ginagmay’ng ideya kon unsaon pagsulbad ang problema sa baha, ingon man ang pagtan-aw nga molihok gyud ang mga gihatagan og tahas.