Gustong mobisita sa anak

Dear Atty. Divine,

Duna koy anak sa akong kapuyo. Ang bata 2 years old na apan nagbuwag na mi sa akong partner kay di gyud mi magkasinabot ug sige lang mi og away. Ang bata naa niya, ug gusto unta ko nga mobisita og makakita sa bata apan di siya mosugot. Iya kong gi block sa Facebook ug di sad siya motubag kung akong tawgan sa iyang cellphone. Unsay angay nako nga buhaton?  Daghang salamat.

Felix

Dear Felix,

Basi sa balaod ang illegitimate child dapat anaa sa inahan ang custody niini apan ang amahan dili sab mamahimo nga hikawan sa iyang katungod sa pagbisita sa bata. Buot ipasabot nga mamahimo ka nga mobisita sa inyong anak. Apan tungod kay gihikawan ka sa imong katungod, mamahimo ka nga mopasaka og reklamo  sa barangay diin nagpuyo ang imong anak ug ang inahan sa bata. Kun di mo ma settle sa barangay, mamahimo nga mangayo sab ka og assistance sa Dept. Of Social Welfare and Services kon DSWS sa inyong lugar. Ang purpose lang ani aron pag settle og aron magkasinabot mo labot sa imong pagbisita sa bata. Kun di gihapon mo ma settle niini then modangop na gyud ka sa korte aron ang hukmanan na mismo ang momando sa inahan sa bata nga tugutan kang maka bisita kay imo man nang katungod isip amahan sa bata. Ang maong hukom dili mamahimong ibalewala sa  inahan kay mamahimo man siyang manubag sa korte kun di kini niya tumanon. Thank you and God bless.

Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.