Asa man gyud ang ang tinuod nga seguridad?

Binasi sa: Mt. 6;19-48

Dili mi adunahan nga pamilya. Wala pud ko maanad nga magdinato. Niadtong bata pa ako, naanad na ako og trabaho tinguha nga makatabang sa pamilya nga nagkinahanglan. Damgo sa usa ka maguwang sa panghinaut nga mahaw-as ang nagkinahanglan gikan sa kalisdanan.

Apan ang maong paningkamot nahimong bugtong tinguha kay dunay uban gitabangan ang dili man pud motabang sa ilang kaugalingon. Mao nga dili seguridad ang pagtabang kay mahimong makalimtan ka sa imong gitabangan.

Hinumdomi dili mo sama og panlantaw ug kasingkasing. Gani ang uban kun dili ka na mapuslan ilubong ka na lang sa kalimot. Ingon ana ang kalibutan, maayo ka lang kun duna kay bili ug pulos segun sa panginahanglan.

Gitan-aw ko ang akong panudlanan makaingon ko nga delikado. Paila lamang kini nga hangtud karon dili ko dato. Ug kun moabot nga ako masakit gipangayo ko sa Ginoo nga kun mahimo, hatagan ko og balatian nga dili makahasol sa uban ingon man sa panudlanan. Maimo man tuod ang kalibutan apan unsaon man kun kalag mo mapukan? Limitado ra gyud ang pagpuyo sa kalibutan. Dunay kinutoban ang tanan.

Lisud ang tinguha nga magpuyo sa kinabuhing balaan. Apan ang kinabuhi dili man hingpit. Matag santos dunay kagahapon, ug ang matag makasasala dunay kaugmaon.

Ning dapita sa akong kinabuhi nakaamgo ako nga bisan unsa kadaghan sa imong nahimo pabilin gihapon kang dautan ug kulang sa mga tawo nga imong gialagaran.

Ug kun moabot na ang panahon nga mamahimo na tingali kong imbalido bugtong rosaryohan ug breviario maoy maghupay Kanako samtang padayong motalidhay ang mabiay biayong katilingban ug katawhan nga kanhi hangyo lubo sa imong pangalagad. Dios Solo Basta! Matud pang Sta. Teresa sa Avila.

Kun naa sa Dios ang matuod nga seguridad unta ang matag akto sa pagkamanggihatagon, makapahimo unta sa kinabuhi nga malipayon bisan pa man kun sa kaulahian, mamahimong sulayan ka sa daghang mga pagmahay.