Pagkahangol ug pagkatapolan

Mipasidaan si DOH Undersecretary Eric Tayag sa publiko nga magbantay nga dili makakaon og mga expired na nga pagkaon’g de lata kay mahimo kining hinungdan sa gitawag nga “botulism” kon pagkahilo. Gihimo ang maong pasidaan human sa insidente didto sa Zamboanga diin gikataho nga adunay 26 ka tawo ang nabiktima sa food poisoning. Mahimo’ng kahangol o ba kaha, kakulangon, ang hinungdan usahay sa food poisoning. Busa dili angayan hukman ang biktima sa pagkahilo. Ginaingon hinuon nga “Ang paghinangol ug pagtinapol maoy duha ka dakong kalipay sa tawo, apan pulos kini dili dungganon.” Muleeeng!

Maantigo na moatiman

Miawhag ang IBON Foundation, usa ka research and advocacy group, nga gamiton sa kagamhanan ang giutang niini nga kwarta sa pagpundo ug pagpalambo sa mga lokal nga industriya ug pagpalig-on sa atong agrikultura. Alang sa Foundation, dili isyu ang pagpangutang kon dili asa ug unsay gamitan niini hilabi na kay milanat sa P 14 trillion ang utang karon sa nasud. Sa kadako na sa utang sa nasud, nakapangomedya na lang ang akong higala sa pag-ingon, “Dili angay kabalak-an ang utang sa nasud kay sa iyang gidak-on, maantigo na ang utang moatiman sa iyang kaugalingon.” Pagkatoytoy!

Panglantaw lang

Bisan sa mga pagsaway nga naani sa Department of Tourism (DOT) ug PAGCOR sa ilang gihimo nga rebranding campaigns, namahayag usab ang Technical Education and Skills Development Authority (TESDA) nga mopahigayon kini og logo design contest. Minilyon ka pesos ang gigasto sa DOT ug PAGCOR, apan mogahin lang ang TESDA og diyes mil isip premyo sa makadaug sa contest. Dili kaayo masabtan sa katawhan ang kamahinungdanon sa rebranding campaign. Hilabi na gayod kon tamdan ang panultihon nga, “Ang (Re)Branding usa lamang ka panglantaw; ug ang maong panglantaw motakdo ra unya sa kamatuoran paglabay sa panahon.” Mao maaan!

Papel kontra bato

Namahayag si Senate President Juan Miguel Zubiri nga mopalabang ang senado og usa ka “strongly-worded” resolution nga mag-awhag sa Marcos administration pagsang-at og reklamo ngadto sa United Nations General Assembly sa giingon ni Zubiri nga “creeping invasion” sa China diha sa West Philippine Sea (WPS). Papel ra ang atong gipasundayag isip pagtuko sa gibuhat sa China samtang ang China aktuwal na nga misulod sa atong teritoryo. Matandi nato kining kahimtanga sa dula nga sambara kon ‘pik’, diin papel ang kanunay natong kartada apan bato usab ang kartada sa kontra. Lupig jud bisan unsaon. Fezteleern!

Pag-atubang sa kalisdanan

Gisalikway sa International Criminal Court (ICC) ang apelasyon sa Pilipinas nga ihunong ang imbestigasyon kabahin sa gubat batok druga ni kanhi Presidente Duterte. Wala panumbalinga ang ato’ng rason ug argumento nga mi-withdraw na ang atong kagamhanan sa Rome Statute. Kanunay nato’ng gipasiatab nga walay jurisdiction kanato ang ICC apan sa samang higayon, mi-apelar usab kita sa mga desisyon niini. Angay tamdan sa atong kagamhanan ang panultihon nga, “Adunay duha ka paagi pag-atubang sa kalisdanan: usbon nimo ang kalisdanan o ikaw mismo ang mag-usab aron atubangon kini”. Atala lageee!